NISUTOY na ang Build, Build, Build project sa gobyerno. Walay lugar sa atong dakbayan nga walay konstruksyon nga gibuhat. Kasagaran niini ang proyekto sa kadalanan gikan sa pinakagamay nga iskenita hangtod sa 4-6 lanes nga dalan. Daghang proyekto sa erya sa Buhangin ilabi sa giplano didto nga bag-ong terminal ug international airport.
Hinuon may proyekto nga natanggong ug hinay ang pag-aginod kay naay problema sa right-of-way, kulang sa pundo sa pagbayad sa pribadong propyedad nga maigo sa dalan ug sa dautang panahon. Makalibog lang nga hinay ang trabaho sa pipila ka proyekto sa ting-init unya nikusog sa panahon sa ting-ulan.
Makarason na hinuon ang kontraktor nga dili nila mahuman ang trabaho tungod sa ulan. Napungot kaniadto si Mayor Sara sa grabeng trapik sa Cabantian padulong sa Milan, Buhangin kay wa pa mahuman ang dalan nga mora na'g basakan.
Gipangtawag niya ang mga kontraktor ug gipasidan-an nga ihatag sa uban ang contract kung dili humanon ang proyekto sa gitakdang panahon. Apan sa kinatibuk-an, gikalipay nato ang mga ingon niining proyekto kay atong nakita kung asa niadto ang buhis nga atong gibayad sa gobyerno.
Niadtong niaging bulan, giablihan ni President Rody Duterte ang expansion sa tulay sa may conversion road. Dugay-dugay sab nahuman ang maong proyekto apan sulit kay paspas ug luag na ang dagan sa trapiko sa maong dapit.
Ang nakanindot pa kay sa diskurso ni PRody, iyang gibaharan ang tanang sakyanan ilabi na ang mga dagkong truck nga dili na mo-parking sa tanang highway sa nasud. Una niyang gimando nga pangdakpon ang tag-iya sa sakyanan nga gigamit ang diversion road isip ilang parking lot, gawas kung naay guba, nga nakapasamot sa trapiko didtong dapita. Hapsay highway na kaayo karon sama sa North ug South Super Highway sa kaulohan nga way sagabal sa motorista.
Sa pagkatinuod, aduna nay balaod batok sa pag-parking sa sakyanan sa highway. As usual, ang kulang mao ang implementasyon sa balaod. Nganong nagkinahanglan pa'g bahad sa pangulo aron molihok ang mga opisyal sa trapiko? Hinaut nga dili kini ningas-cogon ug maayo lang sa bag-o pa.
Sa laing bahin, unta dunay konsehal sa Davao nga mopasar ug balaod nga nagdili sa pagparking sa mga junk sa dalan. Pwede kining tawagon ug "Anti Junk Parking Ordinance of Davao City."
Suroy mo sa palibot di ba makita nato nga daghang guba nga sakyanan nga nagparking sa daplin sa dalan. Diha mismo sa atubangan sa San Pedro Police Station adunay 3 o 4 ka junk nga sakyanan nga nagparking.
Natabunan pa sa lapok ang ligid tungod sa kadugay na diha. Siyaro na man sab nga wa kini makita sa police ug sa TMCC. Ang ubang guba nga sakyanan ginaparking sab sa dalan haduol sa talyer diin kini gipaayo. Unta mangita ug laing butanganan ang tag-iya sa talyer aron dili makabalda sa nagbiyahe.
Unta tan-awon kini sa atong mga opisyal kay daghang daut nga sakyanan nga pirmanenting gina-parking sa kadalanan sa sentro sa syudad sama sa dalang C.M. Rectro, Rizal, San Pedro, Anda, Palma Gil, Uyanguren ug uban pa. Unta tagdon nila kini.