Saycon pamultahon

Mga duwa karon

5:15 pm- UV batok USJ-R (jrs)

6:45 pm- UV batok USJ-R (srs)

GIDUGANGAN sa Cebu Schools Athletic Foundation Inc. (CESAFI) ang ilang gipahamtang nga silot ngadto kang University of San Carlos (USC) Warriors forward Johnriel Saycon gumikan sa pagkahilambigit niini sa kasamok niadtong Dominggo sa gabii sa 2018 Partner’s Cup college division sa Cebu Coliseum.

Nagkanayon si commissioner Felix Tiukinhoy Jr. nga gawas sa suspensyon sa tibuok 2018 Partner’s Cup, si Saycon ilaha sab nga gipamulta og P5,000 ug kinahanglan sab kining moagi og upat ka mga oras nga community service.

Dili makabalik og duwa si Saycon sa regular season kon dili kini niya matuman.

Nahitabo ang kasamok dihang nagkabangga ug nagbinigyanay sila si Saycon ug Tristan Albina sa University of the Visayas (UV) Green Lancers sa nahabiling 4:51 minutos sa kombati nga gidominar sa Green Lancers, 94-67.

Niadtong mga gutloa, diin naglabaw na ang Green Lancers og 31 puntos, parehong natumba sila si Saycon ug Albina. Si Albina nagunit sa iyang apapangig samtang si Saycon naghupot sa iyang tiyan timailhan kon diin sila gibati og sakit.

Unang nakabangon si Albina ug mideretso kini sa lingkuranan sa Green Lancers.

Dihang nakabangon si Saycon, midagan kini paingon sa nahimutangan ni Albina dayong sukmag ug nadugkatan niini ang kasamok diin nanulod na ang mga magduduwa sa duha ka mga kampo sa korte.

Sa laing bahin, ang Green Lancers mopakita na sab og aksyon sa main game karong gabii diin ilang ikaharong ang University of San Jose Recoletos (USJR) Jaguars.

Ang Green Lancers, nga adunay 1-0 nga rekord, gilaumang makasugat og hugot nga kombati batok sa Jaguars.

Napilde man tuod ang Jaguars sa nag-una nilang duha ka mga tahas apan wala kini nagpasabot nga huyang ang ilang puwersa. Pulos kulbahinam ang kapildihan nga ilang naangkon batok sa Warriors, 63-67, ug University of Cebu (UC) Webmasters, 81-84.

Sa high school division, magsangka ang UV Baby Green Lancers ug USJ-R Baby Jaguars sa premirong duwa nga sugdan sa alas 5:15 sa hapon.

Ang Baby Green Lancers adunay 1-1 nga rekord samtang ang Baby Jaguars naghupot og 0-2 nga baraha. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph