HUMAN midaog si Niña Mabatid pagka-kapitan sa barangay Mabolo niadtong Mayo 14, kalit nga nisulbong ang iyang ngalan ug nalakip sa karera pagka-presidente sa Association of Barangay Council sa dakbayan sa Sugbo.
Si Mabatid, kinsa nidagan isip kaalyado sa Bando Osmeña Pundok Kauswagan (BOPK) ni Mayor Tomas Osmeña, karon wa na siya giila nga kaalyado sa administrasyon.
Ang mayor nituboy kang Barangay Captain-elect Franklyn Ong sa Kasambagan nga maoy mahimong sunod nga ABC president sanglit gusto ni Osmeña nga mahulipan si Kapitan Phillip Zafra sa barangay Tisa.
“If you’re not for Franklyn Ong, you’re not BOPK period,” padayag ni Osmeña atol sa press conference kagahapon.
Si Mabatid nagkanayon nga kon siya lang ang pabut-on, di siya mosulod sa maong sitwasyon sanglit nagpapili siya pagkakapitan isip kaalyado sa mayor ug wala siya naghunahuna nga maoy mangulo sa 80 ka mga kapitan sa siyudad pinaagi sa ABC.
“Kay kon dili pani Office of the President, dili ko modawat ani kay samok. Kahibawo baya ko unsa si Mayor Tom masuko,” padayag ni Mabatid kinsa supporter ni Osmeña niadtong 2016 elections.
Apan giklaro ni Mabatid nga hangtod ning pagsuwat sa balita, wa pa siya makadesisyon kon modayon ba siya pagpapili isip presidente sa ABC.
Iyang gihulagway nga aduna siyay katakos pagdumala sa 80 ka barangay sa dakbayan pinaagi sa ABC sukwhi sa gipadayag ni Osmeña sanglit nahimo niya pag-manage ang usa ka kompaniya nga kaniadto pila ra ka buhatan apan karon nilipang ug aduna nay mga sangang buhatan sa lainlaing nasod.
Matod niya nga iyang idol si Osmeña sanglit dihang nahimo kining mayor sa Cebu City niadtong 1988, wa sab kini gihuptan nga public office apan iyang napalambo ang siyudad.
Sama usab kaniya aduna sad siyay abilidad sa pagdumala aron mahiusa ang mga barangay nga dili mabutang og label nga BOPK o Team Rama.
Dugang ni Mabatid nga gidala siya sa Malacanang ni Secretary Manny Piñol sa Department of Agriculture (DA) ug ubang sinaligan ni Presidente Rodrigo Duterte ug gipahibawo nga siya ang padaganon pagka-ABC president.
Gipadayag ni Mabatid nga kon siya ang mahimong ABC president, ang mga proyekto gikan sa national nga para sa mga barangay sa siyudad adto ipaagi sa iyang buhatan. (PAC)