DAGHANG mga kapolisan ang naguol sa dihang mibisita si PNP Chief Oscar Albayalde sa Bohol kaniadtong miaging semana.
Tiaw bay naila na si Albayalde nga labihan ka istrikto og daghan na og napalagpot nga mga kapolisan nga nasakpan nga natulog “while on duty.”
* * *
Matod pa sa usa ka polis “maayo na lang Sir nga hapon na miabot si Chief. Og nasayo pa to og abot, hayan mosuroy to og dali-dali sa mga stations diri, sus, unsa kahay mahitabo og dunay dili ka-preparar.”
Matod pa sa balita, mideretso og bisita si Chief Albayalde sa Camp Dagohoy sa Tagbilaran City aron makigkita og makighinabi sa PNP Chief sa Bohol nga si Sr. Supt. Angeles Geñorga Jr.
Kauban nga mihimamat ni Albayalde ang mga hepe sa kapolisan sa Bohol.
* * *
Dugang pa sa balita, didto sa Amorita Beach Resort sa Panglao natulog si Chief Albayalde, kauban sa iyang pamilya.
Nakigkita sab si Albayalde ni Acting Governor Atty. Dionisio Balite pagka-sunod adlaw didto sa Bohol Bee Farm.
Hangtod niining adlawa, wala mohimo og kalit nga pagbisita si Chief Albayalde sa mga lain-laing police stations sa mga kalungsoran sa Bohol.
Mao kini hinungdan nga nakaginhawa og luag ang mga kapolisan.
* * *
Pait alang sa masakpan, apan himaya sa mga katawhan, ang gihimo ni Chief Albayalde.
Tungod niining iyang gihimo, segurado nga mamenos-menosan na ang abuso sa mga kapolisan kay naila na siya sa iyang pagka-istrikto.
Gani, matod pa ni PRRD, kining iyang pagka-istrikto mao ang usa sa mga hinungdan nga siya ang gipuli ni kanhi PNP Chief Ronald “Bato” dela Rosa.
Daghan si PRRD nga gihisgotan nga mga pangalan apan si Albayalde lang ang nakapasar tungod sa iyang pagka-istrikto.
Karon nga siya na ang namunoan sa PNP, mahibaw-an nato og makahimo ba si Albayalde sa pagtarong sa mga hiwi sa kapolisan sa tibuok nasod.
* * *
Dunay usa ka opisyal sa kapitolyo nga busy kaayo karong mga panahona.
Busy siya og pamalit og mga yuta.
Matod pa, namalit kining maong opisyal og dili momenos sa 100 ka ektaryang yuta.
Daghang mga pangutana ang naglimin sa maong kalihokan, apan mao kini ang pinaka-importante.
Ang pangutana mao kini – dis-a man gikan ang kwarta nga gigamit sa maong opisyal sa pagpalit sa mga kayutaan nga sumala sa records, dili man molapas sa 60,000 ang iyang sweldo matag bulan og wala pod siya magnegosyo?
* * *
Gani, dako ang kalibog sa mga katawhan kay duha ka mga babaye ang iyang regular nga gisuportahan sa tag-60,000 matag bulan.
Una, ang iyang asawa.
Ikaduha, ang iyang kabit.
Asa man kaha magkuha og pang-suporta kining maog opisyal?
* * *
Daghan og mga katingad-an nga mga kalihokan ang maong opisyal.
Dihay anak sa usa ka abogado nga paingon na dakpon sa mga kapolisan panahon sa usa ka buy-bust operation sa usa ka resort-hotel.
Mikalit og abot ang maong opisyal og pagkataod-taod, nanglakaw na ang mga kapolisan.
Daghan ang natingala nga walay nadakpan sa maong buy-bust, apil na ang anak sa maong abogado.
Laing buy-bust ang nahitabo, miabot gihapon ang maong opisyal og laing katingad-an ang nahitabo.
Gidala sa mga kapolisan ang nadakpan nga mga shabu apan human sa laboratory tests, migawas nga tawas lang diay ang maong “shabu.”
* * *
Solusyon ba ang paghatag og katungod sa mga kaparian sa paghupot og armas human mahitabo ang pagpamusil sa mga kaparian karong bag-o?
Dili.
Ngano man?
Una, tungod kay wala pa mahibaw-i ang hinungdan sa maong pagpamusil
Ikaduha, dili mahunong ang pagpamusil bisan pa kon magtagsa og pusil ang mga kaparian.
Ikatulo, nakasupak kini sa ilang mando isip mga kaparian.
* * *
Wala nay mahimo pa si kanhi Chief Justice Maria Lourdes Sereno.
Matangtang na gyod siya sa dayon sanglit gi-deny man sa Supreme Court kagahapon ang iyang hangyo nga i-nullify ang iyang pagtangtang.
Ang 8 ka mga mahistrado nga mibotar batok kaniya mibarog sa ilang baroganan nga tangtangon si Sereno isip hepe sa Supreme Court tungod sa iyang SALN.
Kay final na man kini, wala nay laing kadaganan pa si Sereno gawas sa pagdawat sa kamatuoran nga dili na gyod siya mahimo pa nga mobalik sa Supreme Court.
Natangtang siya sa quo warranto petition og dili sa impeachment.
Karon kay migawas na man ang maong desisyon, mahimo na kaayo buhaton ni Sereno ang gusto niyang buhaton – ang pagyawyaw batok sa iyang mga kaubanan sa Supreme Court, apil na ang merito sa iyang mga kaso.
Mahimo na sab nga magkalingaw na siya og yawyaw batok kang PRRD sa bisan asa nga mga kalihokan.
Mahimo na sab nga molansad na si Sereno sa politika.
Ngano man?
Sanglit matod pa sa Supreme Court, magsugod na og dagan sugod karong adlawa ang 90 ka adlaw nga pagpuli sa nabakanteng posisyon ni Sereno.