DUNA man tuoy nangalipay sa pagpatuman sa kampanya sa Oplan Estambay, dunay mga grupo nga nagkuwestyon niini.
Sama sa Commission on Human Rights ( CHR ) ug Integrated Bar of the Philippines ( IBP ), nipadayag sa ilang kabalaka nga dunay kalapasan sa tawhanong katungod.
Nalipay ta nga adunay CHR ug IBP nga nagbantay ug nagtan-aw sa katungod sa mga tawo nga dili malapas sa mga tinugyanan sa kapulisan nga maoy mipatuman.
Sa akong tan-aw maayo man tuod ang katuyuan sa gobiyerno ni Presidente Rodrigo Duterte, aron malikayan ang paghimo sa krimen, apan di malikayan anaa ang bulilyaso sa unang mga adlaw sa Oplan Estambay. Mao nga nahimugso ang mga pagsaway.
Sama sa pagpatuman sa kampanya batok sa ilegal nga drugas nga miresulta sa mosobra na sa 20,000 ka mga tawo nga giingong durugista ang nangamatay.
Ang dakong gikabalak-an sa gipatuman nga Oplan Estambay kay hayan maoy hagdanan padung sa pagpatuman sa Martial Law.
Sa pagkakaron wa pay kinabuhi ang nakalas apan miabot sa 5 mil ka mga tawo ang nasikop didto sa Metro Manila.
Duna ra bay mga abusadong pulis. Mao anaa ang kabalaka nga di madugay naa nay mapatay kay giingong misukol.
Naay nahimo si Davide
Para nako di man sab makiangayon ang mga pasangil nga way nahimo si Gobernador Hilario Davide Jr sa probinsya sa Sugbo.
Sa akong pagkasayod daghan og mga programang napatuman sa mga kabus nga katawhan ngadto sa kalungsuran sama sa health programs.
Gani dakong pundong salapi ang gigahin sa Kapitolyo sama sa agrikultura , edukasyon ug daghan pa.
Gitahasan sab sa executive department ang buhatan ni Bise Gobernador Agnes Magpale sa mga medical mission, halad ni lola ug lolo.
Nagpadayon ang programang Skolar alang sa mga tinun-an nga anak sa mga kabus nga mga ginikanan.
Pagbatok sa pornograpiya pinaagi sa pagluwas sa mga kabataan nga nahimong biktima sa cyberporn.
Kaabag sa Kapitolyo pinaagi sa opisina ni Magpale, ang PNP, NBI ug International Justice Mission ( IJM).
Sa pagtinabangay anaa ang kalamboan ug ang makabenipisyu ang katawhan.
(Email: efrenlonzon77@gmail.com Text 09235562777)