Lariosa: Isog nga way baruganan

ANG China isog bisag way baruganan. Ang Pilipinas kurog bisag may gitindugan sa pangangkon sa mga isla sa West Philippine Sea tungod sa hukom sa Hague International Court pabor nato niadtong Huyo 12, 2016.

Ang 9-dash-line nga pangangkon sa China gibasura sa Arbitral Court kay sukad masukad way kamatuoran nga sila nakaduma sa maong mga isla busa way historic rights nga makapa-legal sa ilang pangangkon.

Apan di motuo ang China kay ill-founded kuno ang maong hukom. Mao kini karon nga militarized na sa China ang dapit diin naa nay missile installation paatubang sa Pilipinas.

Dakong hulga kini sa atong seguridad nga angayng tan-awon sa kagamhanan ni Duterte pinaagi sa pagpakita nga di na ni maayo ang ilang gibuhat. Uyon ko nga likayan ang gubat, apan di na mao nga mag-upoy-upoy na lang sa hangtod.

Sa nahitabo sa atong mga mananagat nga kuwang na lang abugon sa Chinese coast guards ug hanaan pang dakpon maoy pagpakita nga ila na ang Scarborough shoal ug wa na tay labot.

Di kay witik lang kini sa atong katungod kondi takdang na gyud nga sakit bation sa atong soberanya. Si Foreign Affairs Secretary Peter Cayetano way klaro ang sinultian. Why not have a diplomatic protest or just a diplomatic letter for dialogue on this aspect?

Di man seguro lain kon mopabarog ta sa atong katungod kay ato man nga kabtangan. Nganong mahadlok man ta nga sila masuko? Wa lang ta mahibawo nga kanang ila panghuga lang.

Kon linabanay sa mga nasod ang hisgutan, klaro nga ari gyud nato. Una sa tanan, ang mga superpower interesado sa area tungod sa $3 trillion trade nga moagi sa maong dapit ug sa halapad nga oil ug gas deposits niini.

Gani, ang presensiya karon sa China nakahulga sa free navigation diha sa maong area.

Kon ingon na lang ta ani nga mahadlok sa China, ato na lang ilisan ang katapusang linya sa atong Pambansang Awit: “Ang mamatay ng dahil sa iyo” ngadto sa “ Ay tatakbo ng dahil sa iyo.”

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph