Editoryal: Madudahan

Editorial Cartoon by John Gilbert Manantan
Editorial Cartoon by John Gilbert Manantan

NAPATAY ang high-profile nga binilanggo sa Mandaue City Jail nga si Steve Go human giingong gipusil sa usa ka kaubang binilanggo. Buntag ang hitabo, apan hapon na lang, ang kapulisan ug mga tigbalita naglisod pa sa pagkuha og mga detalye.

Ang mga netizen nagduda sa mga sirkumstansya sa kamatayon ni Go. Di malikayan ang mga espekulasyon ug pagduda nga dunay kalabutan ang mga nagdumala sa mao nga bilanggoan. Lisod katuohan nga makalusot ang armas sa mao nga prisohan taliwa sa higpit nga pagbantay.

Dugangan pa sa kadugay nga nakahatag og detalye sa mga opisyal sa Bureau of Jail Management and Penology (BJMP) sa hitabo ngadto sa kapulisan nga maoy dunay hurisdiksyon unta sa mao nga hitabo.

Naglisod usab ang mga tigbalita sa pagkuha og detalye kay way nanubag nga mga opisyal sa jail.

Niini nga mga sirkumstansya, di malikayan nga ang publiko magduda kay duna nay mga hitabo nga sama niini, sama sa kang anhing Albuera, Leyte Mayor Rolando Espinosa, kinsa giingong napatay sa mga sakop sa Criminal Investigation and Detection Group (CIDG) 8 sa giingong raid sa prisohan.

Si Go, kinsa dunay kasong murder ug gipasanginlan sa kapulisan nga dakong illegal drugs operator, kanunay malambigit sa mga hitabo sud sa Mandaue City Jail.

Niadto lang miaging semana, nitumaw ang iyang ngan human makaplagi ang usa ka sex toy atol sa greyhound operation sa jail.

Hapit kada greyhound diin dunay makaplagan nga illegal ang BJMP officials, motumaw gyud ang ngan ni Go.

Bisan unsa pay buhaton sa BJMP officials, di kalikayan ang mga pagduda sa publiko nga dunay pipila kanila nga nalambigit sa pagpatay o niplano sa mao nga pagpatay, labina nga ang impormasyon ilang gidugaydugay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph