Ernesto D. Lariosa
San Fernando, Cebu
UNANG adlaw sa klase sa unibersidad. Puno ang Room 22 sa sabdyek nga English 12. Gisuhid ko ang panagway sa akong mga klasmeyt, wa koy nailhan. Sa luyo dihay nanagtabi. Sa akong kilid may guwapang babaye nga mopasiklap nako daw ka-estoryahon. Akong giunhan.
“Dugay mang maestra nato, Miss. Gutom na da.” Wa motubag ang babaye apan miabli sa iyang bag ug mitunol nakog biskwit ug tsokoleyt.
“Okey lang ko. maaguwanta pa. Thanks.” matod ko. “Ako si Abel de Leon , ikaw Miss?”
“Daan pa ko, ikaw gyud. Classmate man ta sa Radio Telephony Course didto sa Universal Radio Institute (URI}. Kumosta, uy, nitambok ka man.”
Wa ko katingog sa iyang tubag, hinunoa gisudlay ko ang akong panumdoman ug gitutokan ko siya. “Husto, ikaw si Myrna Alo nga taga Iligan City, ang Miss Universal Radio Institute, nga nawa lag kalit human sa coronation night. Diin ka adto, naminyo?
“Wa, uy, nangluod lang ko.” Unya, nisaysay sa daklit nga pinugos tong pagtungha niya sa URI kay maoy gusto sa iyang amahan nga usa ka radio operator sa foreign vessel nga mag- ngadto-nganhi sa kalibutan. Nahitalunong ko. kay pareha lang mig disgusto. Ako diha ra sad kutob sa Radio Telephony ug wa mopadayon sa Radio Telegraphy. Sultian ta nako si Myrna niini apan wa mahinayon kay miabot ang among maestra nga nagpaila nga siya mao si Miss Leonila Llenos.
Nagkasuod mi si Myrna nga mograduwar na sa iyang pre-medical course nianang tuiga. Ako mao pay pagka first year sa kurso nga education. Kay mihunong kog duha ka tuig paglaroy-laroy sa amo. Nangluod lagi sad ko. Dihang gi-announce ni Miss Llenos nga ako ang top sa prelim exam, gipakpakan ko sa akong mga klasmeyt. Sa iyang pagdayeg, gidapit ko ni Myrna og esnak sa canteen.
“Belib ko nimo, Abel, sa klasmeyt pa ta sa URI mo-top ka permi sa klase. Ang Radio Math imo lang kilawon gani, ako nang imong utok bi?” Kumedya ni Myrna. Igo lang kong mipahiyom sa gisulti ni Myrna. Gitutokan ko lang ang mga mata niini nga daw gilubga’g mga bituon. Lulot ang mga mata ni Myrna.
Gidapit na sad ko ni Myrna sa pagpanuroy diin siya ang molibre sa tanang gasto. Human namo’g pangaon sa Snow Sheen Restaurant sa Colon nanuroy mi sa Plaza Independencia. Dominggo sa hapon ug bugnaw ang huros sa huyuhoy nga nanghikap sa kadahunan sa Plaza. Mi-blow-out si Myrna kay midaog ko sa 3rd prize sa poetry contest sa unibersidad nga gisabak sa The Quill, ang student publication sa tulonghaan.
“Karon pa ko, magbabalak ka diay. You see, I like poets kay nakasabot sa kinaiyahan ug sa pagbati sa tawo.” Mibuak sa kahilom sa among panagtupad sa sementong lingkuranan sa plasa ang tingog ni Myrna nga misuot sa akong kasingkasing. Nakaduko ko kay sa unang higayon gibati ko’g gugma sa paborito kong klasmeyt. Kinsa man say kasingkasing nga di mahigugma kang Myrna? Matahom siya sama sa rosas nga gihamugan ug gipangga sa kabuntagon.
“Myrns, may itug-an ko kanimo.“ Daw nalipay ang kinaiyahan kay kusog mipaypay ang mga dahon sa plasa diin mihana ang kilumkilom sa pagtabon sa palibot, apan gihinginlan lang dayon sa kahayag sa mingbuswak nga mga sugang dagitabnon.
Mitutok si Myrna kanako daw nag-apura nga molitok ang akong mga ngabil sa three words nga “I love you.” Paborito ko siyang klasmeyt nga ako na karong gihigugma.
Human nako malitok ang tulo ka mga pulong, wa kapugngi ang among mga pagbati kay daling nag-akob ang among mga ngabil samtang didto sa panganod nanayaw ang mga bituon. (Katapusan)