MAS dali nga biyahe ug way trapik, mao na unya kini ang masinati sa mga Sugbuanon sa pagsakay sa labing unang water bus sa Sugbo.
Niadtong Lunes dihang gilusad na ang unang water bus sa Maxboat Marine Corp., sa Drydock, Dunggoan, Danao City.
Ang water bus 1 aduna’y kapasidad nga 70 ka mga tawo, ug mao kini ang labing una nga water bus nga gihimo sa Maxboat.
Aduna’y 20 ka mga water bus ang himuon sa Maxboat aron mobiyahe sa kadagatan sa lalawigan sa Sugbo ug target nila nga mahuman ang 10 niini sa di pa motapos ang tuig.
Anaa lang sa usa ka oras ug 30 minutos ang biyahe gikan sa dakbayan sa Sugbo paingon sa lungsod sa Oslob.
Matod sa CEO ug president sa Maxboat nga si Barbara Salmero nga ang Seals Group of Companies ang modumala sa operations sa mga water bus.
Sa South Road Properties (SRP) kini manukad sa dakbayan sa Sugbo ug mopaingon sa pipila ka parte sa Sugbo susama sa Naga, Minglanilla, San Fernando, Argao, Oslob sa habagatang Sugbo.
Ug Liloan, Danao City, San Remigio sa amihanang bahin sa Sugbo.
Si Salmero kinsa usa ka naval architect nipasalig nga mas barato ang pletehan sa water bus itandi sa bus, apan wa pa siya motino kon pila.
Gawas sa airconditioned nga water bus, aduna’y laing water bus nga open air ug mas dako ang kapasidad aron mas daghan ang makasakay.
Plano nila nga point-to-point ang biyahe niini o gikan sa dakbayan sa Sugbo paingon sa usa ka lokasyon ug pabalik.
Nagkantidad og P8 milyones ngadto sa P15 milyones ang usa ka water bus.
Ang mga lumolupyo sa habagatang Sugbo, labina gikan sa Talisay ngadto sa Carcar City dugay nang nag-antos sa kahuot sa trapiko.
Niining water bus, gipaabot ang hapsay ug mas daling biyahe. (HBL)