TANANG mga barangay sa upat ka mga lungsod sa isla sa Camotes nadeklarar na nga drug-cleared.
Hagit karon sa maong mga dapit, lakip na sa lain pang tulo ka mga lungsod ug usa ka siyudad sa mainland Cebu, kansang mga barangay nadeklarar na tanan nga drug-cleared, ang pagmintinar na usab niini.
Mapasigarbuhon ug malipayon nga nidawat sa ilang drug-cleared certificate ang 60 ka mga barangay gikan sa siyam ka mga lungsod ug usa ka siyudad dinhi sa probinsiya sa Sugbo.
Kini atol sa pormal nga deklarasyon nga gipahigayon sa Oversight Committe, pinanguluhan sa Philippine Drug Enforcement Agency 7, Cebu Provincial Anti-Drug Abuse Office ug sa uban pang ahensiya sa gobiyerno kagahapong adlawa.
Lakip sa nadeklarar na nga drug-cleared ang upat ka mga barangay sa San Francisco, Camotes, nga mao ang Montealegre, Northern Poblacion, San Isidro ug Santa Cruz.
Sila maoy nikumpleto sa tanang mga barangay sa isla sa Camotes nga nakaangkon na usab og drug-cleared status.
Ang San Francisco dunay kinatibuk-ang 15 ka mga barangay, 17 sa lungsod sa Poro, 13 sa lungsod sa Pilar ug 11 sa lungsod sa Tudela.
Matod ni San Francisco Mayor Aly Arquillano, dakong hagit ang pag-mintinar karon sa ilang drug-cleared status, ilabi na kay di matag-an ang mga tawo nga mosulod ug mogawas sa isla.
Hugot nga monitoring maoy ilang himuon aron pagsiguro nga di na makasiaw ang mga drug pusher ug user sa ilang dapit.
Gawas sa upat ka mga lungsod sa Camotes island, drug-cleared na usab ang tanang mga barangay sa Bogo City, Borbon, Alegria ug lungsod sa San Remigio.
Ang barangay Hagnaya sa San Remigio maoy nikumpleto sa tanang 27 ka mga drug-cleared barangays sa lungsod human hingpit nga gideklarar sa Oversight Committe.
Gitug-an ni San Remigio Mayor Mariano Martinez, di lang kutob sa Barangay Anti-Drug Abuse Council o BADAC, ang ilang gipalihok.
Matod niya, activated usab ang Purok ADAC, busa di makalusot kadtong mga drug personality, ilabi na karon nga dunay bag-o nga barangay officials.
Lakip sa 60 ka bag-ong drug-cleared barangays ang tanang siyam ka mga barangay sa Alegria ug tanang 18 ka mga barangay sa Borbon.