Pagsirado sa v-hire terminal di na idayon ni Osmeña

DI na ipadayon og sira ni Mayor Tomas Osmeña ang temporary terminal sa V-Hire nga nahimutang sa Citi Center sa barangay Kamagayan, usa ka adlaw human iyang gibutyag nga patak-opan ang maong pasilidad.

Kini human nihangyo si Gobernador Hilario Davide III sanglit makahatag unya kini og problema sa libuan ka mga pasahero nga sagad nagpuyo sa mga lungsod ug siyudad nga sakop sa lalawigan sa Sugbo.

“Nihangyo ta ni Mayor Tommy kay daghan man gud pasahero diha nga taga south ug ang uban taga norte kay maglisod na unya sila pagsakay hinungdan nga nihangyo kong Mayor Tommy ug ni-okay ra pud siya,” saysay ni Davide atol sa interview sa Superbalita Cebu.

Niasoy ang gobernador nga sa pagkabasa niya sa balita kagahapon sa buntag nga pasirad-an ni Osmeña ang terminal nga temporaryong gigamit sa mga van-for-hire nga nagbiyahian sa lainlaing dapit sa probinsya, nisantop dayon sa iyang huna-huna ang mga kahasol unya nga masinati sa mga sumsasakay.

Gihulagway ni Davide nga dako og gikatabang ang maong terminal sa libuan ka mga pasahero gikan sa lalawigan, kinsa mag-ulian matag adlaw ngadto sa ilang lungsod human sa ilang trabaho dinhi sa siyudad sa Sugbo sanglit hamugaway ang ilang pagsaky og V-Hire itandi sa mga bus.

Niadtong Lunes, si Osmeña unang nibutyag nga iyang pasirad-an ang terminal sanglit adunay pag-abuso sa gahom sa unang nagdumala niini diin iyang gitumbok mao si Douglas Labra nga iyang suod nga higala.

Kini human wala mauyoni ni Osmeña ang wa pagtugot sa management sa terminal nga makaparada ang sakyanan sa Barangay Mayor’s Office sanglit ang espasyo gamiton sa V-Hire.

“When it reached the point, when he told the BMO there not to park, I told them to stop. Murag nahimong hari ba., So, I told them to shut down the whole thing,” padayag ni Osmeña.

Gumikan niini, makapadayon sa pagpamasahero ang kapin sa 200 ka mga V-Hire nga naggamit sa Citi Center samtang di usab makahatag og kahasol ngadto sa mga pasahero kinsa nagsalig sa maong terminal para sa dali nilang pag-adto sa trabaho ug pagpauli sa ilang mga balay. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph