NANGHINAOT si basketball legend Shaquille O’Neal nga dili makasunod si LeBron James sa sayop nga iyang nabuhat kaniadto-–ang pagbalhinbalhin sa pamasin nga makalangkat og dugang kampiyunato.
“My problem toward the end of my career was I was trying to shut everybody up and I was greedy (to win more titles),” matod ni O’Neal sa interbyu sa ESPN.
“After I got to three, everybody was saying I couldn’t get another. So I got four. After I got the fourth, they were saying I couldn’t get another one. So I was trying to make quick stops to get it. Phoenix, Cleveland, Boston.”
Ang katapusang titulo ni O’Neal iyang nakuha niadtong 2006 ubos sa kampo sa Miami Heat kaabag si Dwyane Wade.
Nakasakmit siya’g tulo ka sunodsunod nga titulo niadtong 2000-2002 ubos sa kampo sa Los Angeles Lakers kaabag si Kobe Bryant.
Gipasabot ni O’Neal nga naugbok na ni James ang iyang legasiya ug ang pagbalhinbalhin og team posibleng makadaot niini.
Nidugang si O’Neal nga nakabuak na og daghang mga rekord si James unya aduna na sab kini tulo ka mga titulo – duha sa Heat ug usa sa Cavs.
Alang kang O’Neal sobra na kini dekorasyon sa legasiya ni James.
Hinuon nakasabot si O’Neal nga posibleng naggukod pa si James og lain – ang unom ka mga kampiyunato ni legend Michael Jordan sa Chicago Bulls.
Sukad pa kaniadto, buhi ang debate kon kinsa nila ni James ug Jordan ang angayang tawgon nga greastest of all time (GOAT). (AP, ESL)