NAKAENSAYO na sa miaging gabii ang Gilas Pilpinas nga hapit kompleto ang ilang puwersa, pipila ka mga adlaw sa dili pa sila mogikan paingon sa Chinese Taipei alang sa 3rd window sa FIBA World Cup qualifiers.
Gipangulohan ni naturalized player Andray Blatche ang 20 ka mga magduduwa nga ningtunga sa praktis sa Gilas niadtong Dominggo sa Meralco gym.
Nagpakita sab sila si Jayson Castro, June Mar Fajardo, team captain Gabe Norwood, Calvin Abueva, Terrence Romeo, Troy Rosario, Allein Maliksi, Roger Pogoy, Matthew Wright, Jio Jalalon, Carl Bryan Cruz, ug Baser Amer.
Ang wala ra nakatunga sa seniors team mao sila si Japeth Aguilar ug Mac Belo, kinsa parehong adunay gipamating sakit sa tuhod.
Ang Gilas Pilipinas molarga karong Hunyo 25 paingon sa Chinese Taipei, kansang national squad ilang ikasangka karong Hunyo 29.
Human niini, ang Gilas Pilipinas mo-host sa gikahadlukang Australia Boombers karong Hulyo 2 sa Philippine Arena sa Bocaue, Bulacan.
Giangkon nang daan ni national coach Chot Reyes nga wala siya maglaom og dako ning umaabot nilang tahas tungod kay wala’y tarong ang ilang preparasyon. (ESL)