NAPASULOD ni team captain Andreas Granqvist ang iyang penalty kick aron hatagan ang Sweden og 1-0 nga kadaugan batok sa South Korea kagahapon sa World Cup sa Nizhny Novgorod, Russia.
Nakapahuway og kadiyot si Granqvist gumikan sa video review system ug gipahimuslan niya kining maong kahigayunan aron makatutok sa iyang penalty kick.
“I was calm. I waited for the goalie and then I put it in the corner,” matod ni Granqvist. “We got the penalty, we scored, and then it was just a fight to the end.”
Grabe ang kalipay nga gibati sa Sweden gumikan kay mao kini ang labing unang higayon nga nabunyagan sila og kadaugan sa torneyo gikan niadtong 1958.
Ang Swedes, nga nagduwa sa labing una nilang World Cup gikan niadtong 2006, nahatagan og penalty kick human ang Salvadoran referee nga si Joel Aguilar mikonsulta una sa video screen sa sideline.
Si Aguilar mipahunong una og kadiyot sa duwa aron masusi kon aduna ba’y penalty nga angayang itawag dihang mibangga si South Korea substitute Kim Min-woo kang Viktor Claesson.
“There was no doubt it was a penalty and should have been called right away,” asoy ni Sweden coach Janne Andersson.
Kini maoy ikatulong penalty nga nahatag sa nag-unang 12 ka mga duwa sa pretihiyusong torneyo gumikan sa video review. Nakabenepisyo sab niini ang France ug Peru, hinuon nasipyat ang Peruvians sa ilang penalty kick.
Mao kini ang labing unang higayon nga gigamit ang video review system sa World Cup sa Russia.
“We do agree that it was a good call,” batbat ni South Korea coach Shin Tae-yong.
Ang Sweden nakig-uban karon Mexico sa liderato sa Group F. Ang Mexico nipukan sa Germany, 1-0, sa ilang unang tahas.
Ang Sweden makigpinatiray sa Germany alang sa sunod nilang duwa samtang ang South Korea makigbatok sa Germany. (AP)