NABALITAAN nako nga ang Department of Education (DepEd) ilawom sa liderato ni Secretary Leonor Briones dunay taas nga approval rating subay sa Pulse Asia Ulat ng Bayan Survey nga gipagawas di pa lang dugay.
Nasuta sa survey nga sa panahon ni Briones, ang DepEd nakakuha og 83 porsiyento sa Marso sa miaging tuig ug 84 porsiyento sa Marso 2018. Kini mas taas sa milabay nga mga administrasyon. Ug nahitabo kini tungod sa daghang reporma nga giduso diha sa departamento.
Sa akong nakita, nahitabo kini tungod sa paningkamot sa departamento nga mahimo ang ilang trabaho alang ngadto sa mga kabataan, magtutudlo, ug ubang sektor.
Nagpasabot kini nga kalidad nga edukasyon ang ilang gitunol sa mga kabataang Pilipino. Dayag kini sa tubag sa 1,200 ka mga tawo nga gipangutana labot sa gihimo sa DepEd sa tibuok nasud.
Usa sa akong gipasalamatan mao ang pagpakusog sa departamento sa paghatag edukasyon sa mga kabataan nga wa na magtungha, lakip na mga edaran nga nahunong sa ilang pagtuon.
Ning kasamtangan gipakusgan sa departamento ang implementasyon sa K to 12 Basic Education Program. Gawas niini, duna sab silay Balik-Aral sa mga buot motungha, Senior High School (SHS) nga mag-andam sa kabataan sa ilang kahibalo nga makakompetensya na sa ubang kanasuran.
Gitutokan sab ang SHS Voucher Program (SHS VP) ug Education Service Contracting (ESC) aron makapadayon gayud ang mga kabus nga kabataan sa ilang pagtungha.
Di lang kini ang mga gihimo sa DepEd, daghan pa sila og mga programa alang sa mga kabataan.
Apan tungod sa kadaghan sa ilang programa, niutong nalang ang mga magtutudlo sanglit sila ang nalat-akan sa trabaho sa tunghaan.
Suma sa mga magtutudlo, halos tanang programa sa gobyerno, nakigtambayayong gayud ang DepEd mao nga ang mga magtutudlo ang magbaguod.
Usa sa uwahing gireklamo sa mga magtutudlo kining pagmando sa DepEd nga kinahanglan dawaton ang mga bata nga wa pa nag-5 anyos sa pag-abli sa klase sa Kindergarten.
Reklamo sa mga magtutudlo nga daw gihimo na silang 'yaya' sa mga bata nga kwatro anyos pa.
Kon mao kini ang reklamo sa kadaghanan, angay nga mahimong sensitibo ang pamunoan sa DepEd ngadto sa mga magtutudlo. Mas maayo nga trataron nila ang mga magtutudlo nga tawo, di sama makina nga kung di na mapuslan - ilabay lang dayon.