HUMAN sa mga isyu nga gikalambigitan sa Bureau of Jail Management and Penology (BJMP) sa nangagi nga administrasyon, aron nabag-o na ang imahe niini ug mas mibilib ang publiko.
Luyo sa daghang iskandalo nga giatubang niini niadto, mas nahagit pa ang mga opisyal sa BJMP nga naghimo sa tinarong, nga ipakita ang ilang tinuod nga panerbisyo human sila maapil sa di maayong buhat sa ilang mga kaubanan nga gipangtaktak niadto.
Sa administrasyon ni Pangulong Rodrigo Duterte, iyang ginabalik-balik pagsulti atol sa iyang mga pamulong nga di siya gusto sa iyang kadumalaan nga dunay mga kurap nga opisyal ug mga nalambigit sa ilegal nga buhat, kay kini, wala lugar diha kaniya.
Busa usa na ang BJMP nga naghimo og mga remedyo aron ipakita sa katawhan nga tinuod ang ilang panerbisyo, ug aron mabalik ang pagsalig sa publiko ngadto kanila.
Pag Martes, sa Davao City Jail gipakita sa publiko ang pagligis sa mga butang nga bawal sud sa prisohan nga nakumpiska gikan sa mga selda atol sa ilang Oplan Greyhound sa tibuok Davao Region.
Si BJMP spokesperson Jail Inspector Edo Lobenia nagpasalig nga pinaagi niini makapasalig ang publiko sa BJMP nga wala silay giila ug gipili sa pagpatuman sa balaod diin kung bawal kini sud sa prisohan, pagakumpiskahon gayod nila kini.
Hinaut nga di lang unta buhatan sa BJMP ang mopakita sa susama niini, kun di madasig sab unta ang ubang buhatan sa gobyerno tungod giingong duna pa gihapoy mga nagtakuban karon.