DIGOS CITY -- Gipagawas sa mga opisyal ning dakbayan ang ilang kadismaya human wa sila masayod sa ubang mga proyekto nga gipahigayon sa ubang ahensya sa gobyerno dinhi sa dakbayan.
Usa si Konsehal Serafin Senajon nga mialma human nga daghang mga proyekto nga wa gipahibawo ang lokal nga gobyerno mao nga gitahasan niini ang City Planning Office ug City Engineer’s Office nga himuong istrikto ang implementasyon sa mga building permits.
“We must take note that even government structures should secure building permits before the work would commence," suma niya nga nagtumbok sa probisyon sa Local Government Code.
Suma ni Senajon nga angayang masayod ang konseho sa bisan unsang proyekto bisan ang pondo magikan sa probinsya o nasyonal nga kagamhanan.
Gitataw niini nga ang Department of Public Works and Highways (DPWH) ug probinsyang kagamhanan mo-submitar sa ilang mga plano sa proyekto aron di ma-overlap ang siyudad sa mga plano.
Gibarogan niini nga angayang mahiuyon sab sa comprehensive development plan sa dakbayan ang mga proyekto aron di madoble sanglit pagusik-usik kini og salapi.
Sa kasamtangan, adunay ginahimong comprehensive drainage system ang city engineer office aron malikayan ang mga pagbaha panahon sa kusog sa ulan.
Sisan si Konsehal Rey Aballe, nagbutyag nga mahinungdanon sab ang drainage system plan aron masolusyonan ang mga pagbaha sa mga urban areas sa siyudad.
Ang ubang sakop sa konseho misugyot sa city engineer's office nga angayang idili sa publiko ang pagamit sa drainage system sa siyudad sa ilang mga hugaw’ng tubig ug angayang magmuntar kini og kaugalingong septic tank.
Usa lang ang tumong sa konseho sa dakbayan nga dili sila ma-bypass sa bisan unsang proyekto sa gobyerno.
Daghan sab sa mga proyekto sa dakbayan ang gipondohan sa nasyunal nga kagamhanan apan inig kahuman angkunon kini nga daw ilang kaugalingon sa ubang politiko sa lalawigan. (Orlando B. Dinoy)