Barrita: Pagpanalop sa mga estambay

GIPATUMAN sa Police Regional Office 7 sugod niadtong Martes ang pagpanakop sa mga estambay sa tibuok Central Visayas subay sa mando ni PNP Chief Director General Oscar Albayalde nga mibisita sa syudad sa Sugbo niadtong miaging semana, agad sa kagustohan ni Presidente Rodrigo Duterte.

Si PRO 7 Director Debold Sinas namahayag nga ilang basehan sa Oplan Estambay, ang pagpanakop sa mga estambay sa mga hilit nga lugar sa barangay, ang ordinansa sa syudad sa bagransya diin mahimong sikopon ang mga tawo nga magsuroy-suory sa gawas sa balay sa lawom nang gabii.

Apan duna pa bay balaod bahin sa bagransya?

Kaniadto, ubos sa Article 202, Revised Penal Code, gisolotan ang vagrancy ug prostitution. Lakip sa gisilotan niini mao kadtong mga tawo nga baskog apan way klarong panginabuhian ug kadtong mga tawo nga masuroy-suroy sa mga publikong lugar ug kadalanan nga way klarong trabaho.

Gisilotan usab kadtong mga tawo nga way trabaho apan nag-estambay sa kabalayan nga gipuy-an sa di maayog kadungganan, mga bugaw, mga maton ug bugoy nga nakighugoy-hugoy sa mga babayeng mugbog lupad ug mga prostitutes, mga babayeng nagbaligya sa ilang unod.

Ang prostitute mao kadtong babaye nga makighilawas bugti sa kuwarta sa makadaghan ka higayon, sa ato pa, kon kausa ra, di matawag nga prostitute, bisan pag madakpan sa akto nga nakighilawas.

Ang silot sa vagrancy ug prostitution mao ang arresto menor o kaha multa nga di molabaw sa 200 pesos. Kadtong mga recidivist pahamtangan sa arresto mayor medium period ngadto sa prision correccional minimum period o multa gikan sa 200 ngadto sa 2,000 pesos.

Apan giaprobahan niadtong Marso 27, 2013, ang Republic Act No. 10158, nga nag-decriminalize sa vagrancy pinaagi sa pag-amendar sa Article 202 sa Revised Penal Code. Wa nay krimen nga vagrancy ubos sa Revised Penal Code. Apan gisilotan gihapon ang krimen nga prostitution.

Ang gibasihan sa pag-decriminalize sa vagrancy mao ang Art. III, Section 6, 1987 Constitution nga nagkanayon nga “The liberty of abode and of changing the same within the limits prescribed by law shall not be impaired except upon lawful order of the court. Neither shall the right to travel be impaired except in the interest of national security, public safety, or public health, as may be provided by law.”

(edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph