KINING nahitabo nga pagpatay sa kontrobersiyal nga binilanggo sulod sa Mandaue City Jail nga si Steve Go, posibleng makapahunong na sa pagpalusot og illegal nga drugas sa maong bilangguan. Sama god niadtong nahitabo nga pagpusil sa usa ka jailguard sa Cebu City Jail sa mga tawo nga responsable sa pagpasulod og mga kontrabando sa maong bilangguan pinaagi sa “bombing ug fishing.”
Karon wala na kita makadungog nga duna pay naghimo niadto sa Cebu City Jail. Gumikan sa hitabo posibleng mahunong na ang pag-smuggle og illegal nga drugas sa Cebu City Jail. Mao usab kini ang mahitabo sa Mandaue City Jail nunot niining pagkamatay ni Go. Sampol ray gikinahanglan.
Si Go giilang druglord sa wala pa mapriso. Bisan napriso na siya nagpadayon gihapon sa iyang illegal nga kalihukan bisan niadtong didto pa siya mabilanggo sa Talisay City Jail. Gani siya ang gitumbok nga nagsugo niadtong mga suspek sa pagpangrakrak sa Talisay City Jail sa makadaghan nga higayon. Bisan og magpahigayon og sunod-sunod nga Greyhound operation ang mga jail officials, daghan gihapon ang mga kontrabando og illegal nga drugas ang ilang makompiskar gikan kang Go.
Niadtong miaging adlaw, gipusil patay si Go sa iyang kauban ra usab nga binilanggo nga si Cresenciano Heyrana human kini niya bahari nga patyon. Gipusil si Go ni Heyrana gamit ang kaugalingong armas sa biktima nga na-imbargo sa suspetsado. Patay diha-diha si Go. Si Heyrana nag-atubang og multiple murder case. Pangutana: nganong nakasulod man ang armas de fuego? Diin man kini tagoi ni Go nunot sa sunod-sunod nga greyhound operation sa mga jail officers? Adunay kakonsabo si Go nga jailguards?
Daghan ang mitumaw nga mga pangutana, gumunhap ug mga tanghahaga nunot niining kamatayon ni Go. Gipatay gyud kaha si Go ni Enara? Dili kaha “old script” ang gigamit sa mga jail officials aron tuyong patyon si Go? Kana bang gipaagi og riot kuno. Pero para nako dili na importante kon si kinsa ang nagpatay kang Go. Ang importante nga nahipos kining badlungon nga binilanggo.
(bobbygnalzaro@gmail.com)