ear Noy Kulas,
Maayong adlaw. Just call me Brent. Naa ko sa abroad karon nagtrabaho ug minyo na. Seven years na mi sukad nakasal sa akong asawa nga akong gikaila diri sa gawas, nasuod ug nagkauyab for three years pud.
Wa siya makahibawo nga dihang ka usa niuli ko sa amoang lugar ug na meet nako ang akong childhood friend nga maingon nga mutual understanding nga uyab. Minyo na unta siya pero nagkabuwag sila sa iyang bana kay iyang nasakpan nga naay laing babaye. Kay wa silay anak, sayon ra sa akong childhood friend pagpa annul sa ilang kasal.
Pagkita namo, nabalik ang among ka suod ug dunay nahitabo namong duha. Di kay ka usa ra, kon di it happened several times. Hangtod nga nabalik ko sa abroad.
Last year pag-uli nako, didto nako nahibaw-an nga nimabdos diay siya ato ug ako ang amahan. Pero bilib ko niya kay wa siya mosulti nga ako ang amahan.
Igo ra ko niyang gipahibawo nga ako ang papa sa bata nga kon akoy pangutan-on, liwat nako.
Ganahan unta ko mopaila sa bata pero nihangyo siya nga di lang aron di magubot. Pero kon akoy pangutan-on, gusto kaayo nako angkunon in public ang bata. Mahadlok lang siya nga magubot mi pero ako di gyud.
Unsa ang akong buhaton? Okay ra ba nga akong ilhon ang bata nga akong anak? Unsa kahay consequences kon ako ning buhaton? Please tambagi ko.
BRENT
Brent,
Sakto baya ang imong kanhi nga kon paundayunan ninyo ang sitwasyon, seguradong magubot mo kay nahitabo ni sulod na sa imong kaminyuon. Mo-react man gani nang mga asawa bisan kon nahitabo ni sa wa pa ang kaminyuon. Basin nalipay lang usab nang imong kanhi nga nakabaton na siya og anak nga hayan dugay na niyang gipangandoy apan wa mahatag sa iyang kanhi bana. Naay mga babaye nga gusto ra og anak, di gusto og bana o kapuyo kay mahadlok sila nga abusohan sa ilang partner.
Mahimo tingali nga pinaagi sa legal papers, imong ilhon ang bata. Pero mao ni ang timan-i. Kon imong ilhon ang bata pinaagi sa legal papers, iya ning magamit in the future to claim sa unsa may imong mga kabtangan kay imo man siyang giila. Kon di pa ni maka create og problema karon, makamugna ni in the future. Busa, huna-hunaag maayo.
Wa ka mosulti kon duna ba moy anak o wala sa imong asawa. Kon wa, nakasabot ko sa imong excitement. Apan, sa ako nang giingon, huna-hunaag maayo ang tanan kay basin magmahay ka sa linugdangan niini.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)