MIBIYAHE kagahapon (RP time) si San Antonio Spurs coach Gregg Popovich paingon sa San Diego aron ikahimamat ang iyang pambatong forward nga si Kawhi Leonard, kinsa nipadayag nga gusto nang mobalhin og team.
Gikataho sa San Antonio Express News nga nagkasulti na sila si Popovich ug Leonard ug gilauman nga magpadayon pa ang ilang panagsabot.
Si Leonard dayag sa iyang intensyon nga mobalhin og team hinungdan nga naglikaylikay kini nga makigsabot sa Spurs sa nangaging mga adlaw.
Wala’y nasayod kon unsa’y unod sa panagsulti nila ni Popovich ug Leonard.
Giingon nga wala nalipay si Leonard kon giunsa siya pagtrato sa Spurs dihang nagsagubang pa siya og angol sa iyang paa. (Reuters)