Warriors makigbatok sa Cobras

Mga duwa karon

5:15 pm- USC batok CEC (jrs)

7:00 pm- USC batok SWU(srs)

SUWAYAN pagbalikos sa Southwestern University (SWU) Phinma Cobras ang danlog nga kadaugan sa ilang pagpakigbatok sa University of San Carlos (USC) Warriors sa main game karong gabii sa Cebu School Athletic Association Inc. (CESAFI) 2018 Partner’s Cup sa Cebu Coliseum.

Ang Cobras, nga kanhi kampiyon sa regular season, nayatakan og dagkong kapildihan sa nag-una nilang duha mga tahas batok sa University of Cebu (UC) Webmasters, 74-86, ug University of Southern Philippines Foundation (USPF) Panthers, 54-79.

Batok sa Warriors, gilaumang tungason nga bungtod ang kamangon sa Cobras kon tinguha niining maangkon ang labing una niining kadaugan ning pre-season nga torneyo.

Bisan gikan sa makauwaw nga kapildihan ang Warriors batok sa University of the Visayas (UV) Green Lancers, 67-94, makonsiderar gihapon silang inilog batok sa Cobras.

Ang Warriors adunay 2-1 nga rekord.

Sa premirong duwa, ang USC Baby Warriors makigbatok sa Cebu Eastern College (CEC) Dragons alang sa high school division.

Sama sa ilang maguwang, ang Baby Warriors naggunit sab og 2-1 nga rekord samtang ang Dragons adunay 0-2 nga rekord.

Sa laing bahin, dobleng himaya ang naangkon sa UV batok sa ilang kaparang sa USJ-R sa mga kombati niadtong Martes.

Gipangmakmak sa Green Lancers ang Jaguars, 107-96, sa college division samtang mao sab kini ang gibuhat sa Babny Green Lancers ngadto sa Baby Jaguars, 95-86, sa high school category.

Ang Green Lancers, nga ningsaka sa 2-0 nga rekord, nakaangkon og bahin sa liderato sa college division kauban ang USPF Panthers.

Sa ilang bahin, ang Jaguars naunlod sa 0-3 nga baraha ug nagbutang kanila sa delikadong kahimtang nga dili makaabante sa sunod nga round.

Ang Jaguars aduna pay tulo ka mga duwa nga nahabilin.

Ang Baby Green Lancers ningsaka sa 2-1 nga rekord sa high division samtang ang Baby Jaguars, sama sa ilang maguwang, nangatagak sab sa 0-3 nga baraha. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph