PADS mamugsay sa Hong Kong

ANG tinuig nga International Dragon Boat Race, nga gipasiugdahan sa International Dragon Boat Federation ug Asian Dragon Boat Federation, ipahigayon karong Hunyo 22-24, 2018 sa Central Harbourfront sa Hong Kong.

Ang 2018 CCB (Asia) Hong Kong International Dragon Boat Races (IDBR) giorganisar sa Hong Kong Tourism Board kaabag ang Hong Kong China Dragon Boat Association.

Ang Hong Kong Dragonboat Carnival giisip nga usa sa pinakadako nga internasyonal nga dragonboat racing event sa kalibutan nga adunay gibana-bana nga 5,000 ka paddlers gikan sa kapin 100 ka international ug local teams nga nagrepresentar sa mga nasod gikan sa Europe, North America, US, Middle East ug Asian.

Ang PADS Adaptive Dragonboat Racing Team ug mga kampiyon sa bag-o lang nahuman nga International Dragonboat Race dinhi sa siyudad sa Naga gidapit na usab nga morepresentar sa Pilipinas aron panalipdan ang ilang titulo sa International Paradragon event nga mahitabo karong Hunyo 24.

Ang PADS maoy una ug bugtong cross-disability dragonboat team sa Pilipinas.

Karong tuiga, ang PADS Team mosalmot sab sa International Open ug International Mixed (small ug standard boat) nga mga kategoriya diin ilang ikasangka ang non-disabled nga international dragon boat teams.

Kadaghanang naglangkob sa PADS mga paddler nga adunay disabilities nga gipangulohan sa ilang team captain nga si Arnold Balais, usa ka multi-awarded nga kanhi Paralympic athlete ug swimmer. (Lloyd Earl Sabequil, CNU Comm. Intern)