SA labing unang higayon, mopakita na og aksyon ang Cebu City Sharks batok sa Bacoor Strikers sa premirong duwa karong gabii sugod sa alas 7:00 ang takna sa Maharalika Pilipinas Basketball League (MPBL) 2nd conference sa Muntinlupa Sports Complex sa Muntinlupa City.
Sa main game, magsangka ang hosts Muntinlupa Cagers ug Marikina Shoemasters.
Sukad sa ilang pagkaporma, ang Sharks sulod na sab sa usa ka buwan nga hugot nga nag-ensayo sa Manila ug alang kang coach Gilbert Castillo, andam na sila nga mopagawas sa ilang mga hinaguan.
Hinuon ning kombatiha, dili pa makaduwa ang usa sa labing sinaligan sa Sharks nga si Patrick Cabahug gumikan kay kasamtangan pa kining nagduwa sa Thailand.
“Sa pagkakaalam ko, sa June 30 pa yata darating si Patrick kasi may obligation pa siya sa isang local league sa Thailand pero we are ready na man. Makikita na natin ang pinaghirapan namin sa training bukas (karon),” matod ni Castillo sa pagpakighinabi ning mantalaan kagahapon.
Sa pagtuo ni Castillo, mas nakapabor ang puwersa sa Sharks kumpara sa Strikers hilabi na sa ilawom nga bahin.
“Ang alam ko, andiyan si Marlou Aquino sa Bacoor pero hindi na ganoon ka effective si Marlou ngayon compare sa big men natin na mga bata pa,” dugang ni Castillo, kinsa sama ni Aquino, kanhi sab magduduwa sa Philippine Basketball Association (PBA).
”At saka sa tingin ko, may advantage tayo sa outside shooting kasi ang mga Cebuano magagaling talagang tumira. Kagaya natin, bagong team rin ang Bacoor. I think kaya nating manalo sa larong ito.”
Sa ilawom nga bahin, ang Sharks mosandig nila ni Eric Rodriguez, Kevin Villafranca, Jondan Salvador, ug Raffy Octubre, nbga pulos adunay 6’4” nga gitas-on.
Ang ubang mga sakop sa Sharks mao sila si Ian Ortega, Harold Cortes, Cesar Catli, Alfred Codilla, Enrico Llanto, Garciano Puerto Jr., Iron Suano,Victor Nunez, John Abad, William Mcaloney Jr., Bill William, Francisco Arong.
Giangkon ni Castillo nga kuwang sa gitas-on ang Sharks apan mobawi sila sa pinaspasay nga duwa ug depensa.
“Ito na man talaga yung strength natin, ang ating quickness at depensa. Maliliit nga tayo pero lalaban tayo,” batbat ni Castillo.
Matod ni Castillo nga basi sa iyang nakita sa pipila ka mga duwa nga napahigayon, dili mabintahaan ang puwersa sa Sharks apan hangtod nga dili niya makit-an ang kapabilidad sa tanang teams, dili pa siya makabanabana kon unsa’y ilang ikabuga sa kompetisyon.
Gikan sa 10 ka teams sa premirong conference, ningburot na sa 26 ka teams ang ningsalmot sa 2nd conference hinungdan nga dili sayong ang paghatag og prediksyon kabahin sa poruhan sa usa ka puwersa.
”I can’t promise anything right now kasi iilang laro at iilang teams pa lang naman ang nakita namin. But one thing is for sure, hindi na ako takot dahil maganda ang training natin,” asoy ni Castillo. (ESL)