GITATAW ni Mandaue City Mayor Luigi Quisumbing nga condomium units ang tukuron alang sa socialized housing project nga gitanyag sa Office of the President sa Dakbayan.
“The only reasonable way nga ma-accommodate ta og daghang families from the informal settlers will be to build vertical housing.,” ni Quisumbing sa pakighinabi sa Superbalita Cebu kagahapon.
Sa milabay nga semana, nitawag si Special Assistant to the President (SAP) Bong Go sa kagamhanan sa dakbayan sa Mandaue alang sa pagpahibawo kalabot sa socialized housing projects di lang sa mga uyamot, apan lakip na sa mga kawani sa kagamhanan sa dakbayan.
Niadtong Martes, si Quisumbing nakighimamat kang National Housing Authority (NHA) General Manager Marcelino Escalada aron hisgutan ang maong proyekto.
Gibutyag sa mayor nga anaa sa mga 800 ka mga units ang tukuron unya sa duha ka dagkong proyekto nga himuon sa Barangay Looc ug Barangay Labogon.
“Given the standard measurement sa NHA, it looks like that we will be able to build close to 450 to 500 units for the informal settlers possibly in Brgy. Labogon. Then, we will be able to build something like around 300 for casual and regular government employees in Brgy. Looc,” ni Quisumbing.
Apan matod niya nga posibleng ibalhin ang housing project sa mga kawani sa city hall sa Labogon ug ang mga informal settlers sa Looc.
“It depends on the site visit and recommendation by the NHA which is being conducted this morning (kagahapon sa buntag) together with the team from the city engineering and city planning,” sumala pa sa mayor.
Nasuta sa Superbalita Cebu nga base sa standard computation sa NHA sa duha ka dagkong mga proyekto, halos moabot og P1bilyones ang itagana nga budget unya niini.
“We’re very thankful for the project from the President. It is our understanding that if all the systems are go, we would be able to do the ground breaking around August,” ni Quisumbing.
Dugang sa mayor nga kalabot sa pagpili sa benepisaryo, hatagan siya og template sa mechanics sa NHA kalabot niini, apan iyang buhatan gihapon ang modesisyon sa kon si kinsa ang pilion nga benepisaryo. (JPP)