KAPIN sa P1 million nga balor sa gituohang shabu ang nasakmit atol sa gipahigayon nga operasyon sa kapolisan batok sa illegal nga drugas didto sa Sitio City Central, Barangay Luz, dakbayan sa Sugbo niadtong Martes pasado alas 9 sa gabii.
Nasikop sa maong operasyon ang tulo ka mga suspetsado nga pulos residente sa nahisgutang dapit kinsa giila nga sila si Danilo Abay Jr, 27, Marnel Olimba, 21, ug si Lucien Andrino, 38.
Ang mga kapulisan mihimog buy bust ug entrapment operation batok sa ilang subject nga duha ka giingong mga high value target nga sila Abay ug Olimba apan diha usab sa maong lugar si Andrino nga padung unta mohimo ug pot session.
Nakuha sa posisyon ni Abay ang 13 ka elongated sized nga pakete nga adunay sulod nga illegal nga drugas, 18 ka medium sized nga pakete sa gituohang shabu, usa ka libo nga kwarta ug usa ka gatos nga halin sa pagpamaligya og drugas, ug usa ka portable nga timbangan.
Nakuhaan sab si Olimba og tulo ka medium sized nga pakete sa gituohang shabu ug P500 nga buy bust money.
Usa ka gamay nga pakete sa gituohang shabu ug mga drug paraphernalia nga usa ka tooter ug lighter ang nakuha gikan sa posisyon ni Andrino.
Mokabat ngadto sa P1,450,220 ang kantidad sa mga na-recover nga gituohang shabu gikan sa mga suspetsado nga adunay gibug-aton nga 122.36 ka gramos.
Ang mga nadakpan kasamtangang nabilanggo ug mag-atubang ug kasong kalapasan sa RA 9165 kon Comprehensive Dangerous Drugs Act of 2002.
Samtang nabalhog sab ang usa ka lalaki nga si Ed Tristan Badrina, 34 anyos, human kini maaktuhan sa paghupot ug illegal nga drugas didto sa Barangay Labangon niadto gihapong Martes, pasado alas 11 sa gabii.
Mipahigayon og roving patrol ang mga kapulisan sa Police Station 10 diin nasikop ang maong suspetsado ug giingong nakuhaan kini og lima ka medium sized nga pakete sa gituohang shabu nga nitimbang ug 25 ka gramos nga nibalor ug nga nibalor ug 295,000 ka pesos.
Sa dakbayan sa Talisay, mokabat og dul-an P100,000 nga kantidad sa ilegal nga drugas ang nakompiska sa kapulisan atol sa ilang gi pahigayun nga sunod-sunod nga buybust operation sa Brgy. Tabunok sa miaging adlaw.
Ang mga nadakpan mao sila si Clyde Berang Jabellan, 23 anyos, Victoriano Nacario, 47 anyos, puro lumulopyo sa maong dapit ug si Rustom Lawas Tapinit , 24 anyos, taga Brgy. Cantao-an, siyudad sa Naga.
Nakuha gikan sa mga suspek 47 ka gagmay ug duha ka medium size sa gituohang shabu nga motimbang og 13.5 ka gramos ug gi bana-banang mo kantidad og P93,500.00.
Ang buybust operation gipanguluhan ni PSUPT Marlu Palomaria Conag, Chief of Police sa Talisay City, inabagan sa Philippine Drug Enforcement Agency (PDEA-7). (Clark Jude Suhot-Correspondent, Christine Joyce Secuya, CNU Intern)