TIGPATUMAN sa Witness Protection Program sa Department of Justice (DOJ) sa Central Visayas niawhag sa korte nga i-discharge o tangtangon na sa listahan sa mga akusado sa pagpatay kang Bien Unido, Bohol Mayor Gisela Boniel silang Riolito Boniel ug Randel Lupas.
Gipasabot ni Assistant Regional Prosecutor Llena Ipong-Avila sa Lapu-lapu City RTC Branch 65, gipasabot nga silang Lupas ug Riolito sanglit hingpit na nasulod sa Witness Protection Program (WPP) ug nahimo na silang state witness sa kaso.
Nag-unang akusado sa pagpatay kang Mayor Gisela mao ang iyang bana nga si Bokal Niño Rey Boniel.
Si Riolito kinsa ig-agaw ni Niño Rey nitug-an nga kuyog siya sa bokal dihang gilabay ang lawas niini sa kadagatan sa taliwala sa Lapu-lapu ug Bohol.
Samtang si Lupas, maoy usa sa gimanduan sa bokal nga mo-alsa sa giputos ug habol nga lawas si Gisela paingon sa pump boat, sa wala pa kini gilabay.
Matod ni Fiscal Avila, ang pagkasulod nilang Riolito ug Lupas sa WPP, naghimo kanila nga immune sa criminal prosecution.
Gawas niini, gitumbok niya nga magamit ang ilang testimoniya batok sa akusado nga nag-atubang og bug-at nga mga kaso sama sa murder ug parricide.
Gawas niini, dako ang panginahanglan sa ilang testimoniya kay sila lang ang posibling makasaksi sa krimen samtang wala na sa’y laing direktang ebidensiya nga mahimong magamit.
Nasuta usab nga “less guilty” sa krimen ug wala pa usab silay record nga nakombikto sa bisan unsang krimen nga makapadugang sa ilang kridibilidad. (AZLG)