NASAKMIT sa Bureau of Customs (BOC) nga nagbase sa tugpahanan sa Mactan ang 20 million Japanese Yen (P9.6 million o $181,000) sa dihang ang Hapon nga nagdala niini wa modeklarar sa kuwarta atol sa iyang pag-abot niadtong Hunyo 12.
Gipresentar ni Customs Commissioner Isidro Lapeña ngadto sa mga tigbalita ang kuwarta nga nasakmit gikan ni Yuki Sakaguchi, 32, taga–Tokyo, Japan.
Ang langyaw nag-atubang og kasong kalapasan sa Customs Modernization and Tariff Act tungod sa wa pagdeklarar sa gidak-on sa maong kantidad nga kalapasan usab sa Banko Sentral ng Pilipinas (BSP) Circular no. 922-2016 nga misobra sa $10,000 cash nga gibitbit.
Base sa Customs Declaration form, wa motug-an si Sakaguchi sa kantidad taliwala sa nakita sa x-ray machine diin gipatongpatong ang binandol nga yen diha sud sa gibitbit niining bagahe.
Gipaubos sa inspection ang bagahe ug nasuta ang undeclared cash.
“Kung $10,000 below you need not to declare, but if you’re carrying more than $10,000 or equivalent you have to declare. ‘Yan ang requirement o provision ng BSP circular,” matod ni Lapeña.
Matod pa ni Lapeña nga nagdumili sa pagluwat og bisan unsang pamahayag ang dinakpan kinsa gipa-ubos sa inquest proceedings niadtong Lunes ug nakapiyansa og P60,000 alang sa iyang temporaryong kagawasan.
Mipasalig ang opisyal nga di makagawas sa nasud si Sakaguchi sanglit anaa nila ang iyang passport.
Nasuta nga kini maoy unang pagtaak sa langyaw sa port of Cebu ug nagpadayon ang imbestigasyon kalabot niya ilabi na ang pagsuta sa iyang personal background ug unsay gamitan sa dakong kantidad nga iyang gidala.
Gikatakda nga karong Septiyembre 22, 2018 maoy arraignment sa kaso ni Sakaguchi.
Ang kuwarta nga nasakmit iduso ngadto sa national treasury human sa tanang legal procedure nga ipahigayon kabahin sa pagkasakmit ug di na mauli ngadto sa tag-iya niini.