PULIS nga sakop sa Consolacion police station nabilanggo human gi-entrap sa Talamban police station sa Cebu City Police Office (CCPO) human giingong nangayo og P10,000 sa tag-iya sa cellular phone nga nawagtang niadtong miaging adlaw.
Nabilanggo sa Talamban police station si SPO2 Vicente Dela Peña Gila Jr., human masikop sa entrapment sa usa ka mall sa Mandaue City.
Nakuhaan siya og cellphone nga gipanag-iya ni John Vincent Gonzaga Rafols, 22, taga West Insular, Barangay Lanang, Dakbayan sa Davao, apan kasamtangan nga nagsaka sa usa ka hotel sa Cebu City.
Giingong nahabilin sa taxi ang iPhone 8 ni Rafols, apan giingong na turn-over kini ngadto kang Gila.
Sa imbestigasyon, gitawgan ni Rafols ang numero sa iyang cellphone ug gitubag usab sa nagpailang pulis.
Nidemanda, matod pa, si Rafols nga makuha lang niya kini kon hatagan siya sa iyang gipangayo nga P10,000.
Tungod niini midangop si Rafols sa Talamban police station ug giplano gilayon ang entrapment operation.
Nagsabot ang duha nga magkita sa usa ka mall sa Ibabao Estancia, siyudad sa Mandaue.
Pagtunol sa kwarta ni Rafols kang Gila, wa magtuo ang pulis nga aduna diay ni kauban nga laing pulis gikan sa Talamban ug dayong pahibawo nga dakpon siya sa salaod nga robbery extortion.
Ang hepe sa Consolacion police station Chief Inspector Geral Pelare mitug-an nga mihimakak kaniya ang iyang pulis nga nangwarta kini.
Giingong siya ang giturn-overan sa usa ka taxi driver ug iya matod pa kinasingkasing nga giuli ang maong cellular phone.
Apan matod pa ni Pelare nga sa wa pa mahitabo ang entrapment , ni-coordinate kaniya ang hepe sa Talamban nga dakpon nila ang iyang sakop.
“Mi coordinate ang hepe sa Talamban nako ana. Sa akong side, mohimo mig linain nga investigation ana kay dili mi mo tolerate sa gihimo sa akong tawo,” matod ni Pelare.
Si Police Regional Office 7 Chief Supt. Debold Sinas nimando dayon nga paimbargohan sa iyang armas si SPO2 Gila ug pasakaan og kasong kriminal ug administratiba nga taktakon sa trabaho.
Nasagmuyo si Sinas sa gihimo sa iyang sakop nga bisan sa kadako na sa ilang sweldo mohimo pa gihapon og dautan sama sa pagpangilkil.
Nimando si Sinas pagpaubos sa drug test kang Gila sanglit siya nagduda nga sama niining klase sa pulis nga wa matagbaw sa kadako sa sweldo, nagbisyo kini.
“Kanang mga ingon ani nga klase sa tao nga bisan taas na ang sweldo dili pa matagbaw, naa ni bisyo ba. Ako gyud ni ipatangtang,” matod ni Sinas.
Pulis gipatay
Pulis nga giingong high value target kay giingong naapil sa drugas namatay human gipusil sa duha ka mga killer nga naglakaw lang paghuman sa krimen sa miaging gabii sa Sitio Kabangkalan sa Brgy. Daanlungsud, dakbayan sa Toledo.
Si PO2 Melchizedek Batomalaque, 37, kanhi sakop sa Toledo Police sa CPPO nga nadistino na sa Autonomous Region in Muslim Mindanao patay human nakaangkon og samad pinusilan sa iyang ulo ug kalawasan.
Si SPO1 Marciano Suarez, imbestigador sa Toledo Police Station nga nahinabi sa Superbalita Cebu, nagkanayon nga si Batomalaque diha sa tugkaran sa iyang panimalay.
Misakay kini sa iyang motorsiklo padulong sa proper sa dakbayan.
Apan kalit lang ningbutho ang duha ka mga mamumuno dayong pusil kaniya.
Human sa pagpamusil, yano lang nga naglakaw ang mga killer nga gikatahong nagkawo og pinayongyong samtang nag-t-shirt.
Gidala sa mga kabanay si Batomalaque sa tambalanan apan patay na kini.
Ang kapulisan nakarekuber sa crime scene sa tulo ka mga kabhang sa kalibre .45 nga pistola ingon man usa ka bala niini.
Ngitngit ang dapit hinungdan nga walay nakamay-ong sa mga killer.
Ang maong pulis napalagpot sa Toledo police niadtong 2016 human gilambigit sa ginadiling drugas.
Si Suarez nibutyag nga ang maong pulis duha ka simana na sa ilang lugar kay nitambong sa husay sa iyang kaso sa illegal drugas.
Si Supt. Mina Domingo, hepe sa Toledo Police nga nahinabi sa Superbalita nagkanayon nga nakig-alayon pa sila sa kapulisan sa ARMM pagsuta kon tinuod ba nga mitambong sa husay si Batomalaque maong nipauli kini sa Sugbo.
Lista ni Duterte
Nalakip sa listahan ni Presidente Rodrigo Duterte si Batomalaque.
Matod ni Sinas nga si Batomalque gilabay gawas sa PRO 7 niadtong 2016 ug gidestino sa ARMM tungod sa giingong kalambigitan sa illegal nga drugas.
Apan bisan pa man niini iyang gimandoan ang Toledo City police station nga palawman pa ang ilang imbestigasyon ug susihon kining nagpusil sa biktima.
Lakip sa mando ni Sinas nga mo-umol og Special Investigation Task Group nga pangulohan ni Supt. Domingo Mina.
Makig-alayon usab sila sa ARMM Police Office kon aduna bay pagtugot si Batomalaque nga mobiyahe paingon sa Sugbo ug di ba Awol.
“He might be because he was considered in the list of PRRD and we are verifying kung awol na talaga siya.”
Gikompirmar niya nga nalakip sa ilang HVT ang pulis tungod sa kalambigitan sa drugas.