HAPIT gidoble ang umento sa sweldo sa mga opisyal ug ginsakpan sa Philippine National Police (PNP) ning administrasyon ni Presidente Rodrigo Duterte. Iya ning saad kaniadto ug iyang gituman.
Ang iyang tumong mao nga di na matintal ang mga pulis sa pagpangurakot o kaha malambigit og mga krimen, sama sa pagka protektor sa mga drug lord ug gambling lord, pangilkil ug uban pa.
Sukwahi sa gipaabot, daghan sa mga pulis ang nalambigit gihapon sa mga krimen.
Niadtong miaging adlaw, gidakop si SPO2 Vicente de la Peña Gila Jr. sa kauban ra sab niyang mga pulis human siya giingong nangilkil og P10,000 bugti sa iPhone 8 nga iyang nakit-an nga iya sa usa ka manager nga taga Mindanao, apan nianhi sa Cebu.
Karon, tungod sa iyang gibuhat, gipadis-armahan siya ug imbestigahon alang sa posibleng pagtaktak kaniya sa serbisyo.
Bisan unsaon pa og pamakak sa mao nga pulis, kinabag-an sa publiko magtuo nga tinuod ang mao nga alegasyon. Lisod baya pasanginlan o tumo-tumoan ang awtoridad, gawas kon ang alegasyon bug-at og kapasikaran.
Makahimangod kini tungod kay bisan sa pagpaumento og maayo sa ilang sweldo, naa gihapoy mga pulis nga malambigit sa ingon niini.
Di diay garantiya nga ang dakong sweldo makapadismaya sa mga pulis nga maghimo og kabuang sa ilang trabaho. Kay si Gila di lang ang bugtong pulis nga naakusahan sa pagpangilkil, daghan na.
Gani, ang mga pulis nga naa sa drug list ni Duterte nagpadayon sa ilang kalambigitan sa illegal drugs. Namatud-an ni sa PNP intelligence monitoring. Ang mga pulis nga labing uwahi nga nangamatay pulos gilambigit sa illegal drugs ug naa sa ilang profile ang ilang kalambigitan.
Kini nagpasabot nga way epekto ang dakong sweldo kay ang kahakog na sa kwarta ang nagpatigbabaw kanila.