GINAINGON nga ang sala mao ang pagsupak sa kasugoan kay kon walay sugo o balaod walay mahimong sad-an. Ang sala misugod didto sa tanaman sa Eden ug misugod ang kasakit sa kaliwat ni Adan ug Eva hangtud karong panahona ug mas migrabe ang epekto niini sa tibuok kalibutan.
Ang sugilanon nagsulti nga natental si Eva kay nagpaduol man ug naminaw sa bitin nga giingon sa Bibliya nga mao ang Yawa nga nagtakuban. Dihang gipangutana sa Diyos si Adan kon asa sila ug nakasala ba sila, iyang gitudlo si Eva ug sa pagpangutana kang Eva, iyang gitudlo ang bitin nga maoy hinungdan sa sala.
Niadtong Martes, petsa 19, adlaw nga natawhan sa atong nasudnong bayani, si Dr. Jose P. Rizal. Mao sab kining adlawa nga gibasura sa mga sakop maghuhukom sa Supreme Court ang pagtudlo kang Maria Lourdes Sereno isip Chief Justice tungod wa siya misumiter sa iyang statement of assets liabilities and net worth (SALN). Ang wa pagsumite ni Sereno sa maong SALN daw usa ka gamay nga butang o gamay nga kalapasan nga nagpapas sa iyang titulo nga Chief Justice.
Ang lintunganay sa mga hitabo gibasol ni Sereno nga pagpangatake kuno sa administrasyong Duterte sa kagawasan sa hudikatura nga unsa man unta sa gawasnon nga departamento sa kagamhanan. Si Presidente Duterte na hinuon ang nahimong sad-an. Karon nagsugod na siya sa iyang bag-ong kawsa aron kuno panalipdan ang katawhan nga dinaug-daug tungod sa mga paglapas sa mga batakan nga balaod ug sa pagpanalipod sa ilang tawhanong katungod.
Sagad ug simple nga depensa sa mga sad-an mao ang pagpasiatab sa kunohay sala sa kaatbang inay nga dawaton ang iyang sala tungod sa garbo aron likayan ang kaulawan.
Sa iyang kahimtang karon ginatan-aw siya sa pundok sa oposisyon nga material nga ilang i-atbang sa mga kandidato sa administrasyon sa umaabot nga eleksiyon sa 2019 kay usa kuno ka tigpanalipod sa kababayehan.
Hinuon, katawhan man ang maghukom kon angay pa ba siyang hatagan og posisyon sa gobyerno ug unsa kaha ang mahimo niyang tumong ugaling man modagan? Alang ba sa pagpalambo sa nasud o aron mangita'g ikasaway sa mga programa nga ipatuman? Hmm... angay natong bantayan.
****
Nakatuon na ba kaha si Secretary Christopher “Bong” Go sa sekreto ni Presidente Duterte nganong wa kini makasinati og kapildihan sa iyang political career karon nga nagkadaghan ang nagatukmod kaniya nga modagan pagka-sendor sa 2019?
Atong makita ang dagko nga mga tarpaulin sa pipila ka mga dapit nga nagkanayon “Dagan Bong Go, dagan”. Makita na sab ang iyang presensiya sa dagko nga mga event nga iyang ginatambongan nga dili kauban si President Duterte.
Dili layo sa kadaugan ugaling modagan o moapil sa politika si Bong Go tungod sa kadaghan sa mga suporter ni Digong nga posible motabang o moboto kaniya pag-abot sa eleksiyon. Dinhi atong makita ang gayuma ni Digong nga puwede motakud sa iyang ituboy nga mga kandidato kay ang eleksiyon padaghanay ra man og tawo.
Qualified sab si Bong Go bisan intsek ang iyang apilyedo kay usa man siya ka Pilipino. Kamao mobasa ug mosulat ug naay ikapanghambog kon natad sa edukasyon ang hisgutan.
Mahitabo nga duha ka taga dakbayan sa Davao ang mokandidato pagka- senador sa 2019 kay una na nang mipasibaw sa iyang interes si Congressman Karlo Nograles nga nakighiusa sa ilang kampo kang Presidente Duterte niadtong 2016.
Usa kini ka maayo nga katikaran sa dakbayan sa Davao ugaling mahimong palaran tungod si kanhing Alejandro “Landring” Almendras pa lang ang Dabawenyo nga nahimong miyembro sa Senado sa kasaysayan sa atong nasud.
Ubos sa administrasyon ni Presidente Duterte atong nakita ang kusog nga paglambo sa atong dakbayan kay dili ikalimod nga mao na gyud kini ang dagan sa mga dapit nga dunay masaligan didto sa Senado, Kongreso ug mga national nga buhatan.