NAG-TRENDING sa social media ang natigayong rerouting scheme nga gipatuman sa Davao City Transport and Traffic Management Office (CTTMO) kagahapon gumikan daghan ang nanga-late sa ilang mga lakaw.
Sumala sa Facebook (FB) comment ni Chona Pino Cochiengco nga resulta kini sa dugay mahuman nga project.
Giingon niini nga paspasan unta ang mga road widening project sa gobyerno ug diha kini paspasan panahon sa bakasyon aron walay mga ma-late nga mga estudyante.
“Problema ang project hastang dugaya mahuman, abtan og pila ka tuig, tan-awa tong dapit sa Crocodile Park, perting dugaya, hasol sa tawo. Kinsa may contractor aning infrastructure sa Davao? Gusto man tag kalamboan, pero tarungon unta pod kanang di kaayo dugay. Unta gabii ang trabaho pareho sa Manila. Naa unta'y bakasyon wa gisugdan, nga karon mao pa'y ting klase mag-widening napud,” post ni Cochiengco.
Samtang si Rel Gabule Dacillo nag-ingon sa iyang FB comment nga problema pa gyod ni sa permiro, pero kung madugay na, maanad naman sab ug kabahin lamang kini sa dako nga kalamboan sa siyudad.
“Para nako, purya lang sa maigo ug sa walay pabor-pabor, ang tanan dunay solusyon, ana man gyud na sa sugod daghan og mga moreklamo, pero maanad rana sila kay alang man pod kini sa atong kaayohan inig kahuman ana nga proyekto,” ingon ni Dacillo.
Ang mga sumasakay ug ang mga motorista giabi-abi og grabeng kahuot sa trapik human nga ang Talomo Bridge 1 gisirad-an sugod Martes sa buntag, Hunyo 20, aron nga hatagan og higayon ang gihimong pagbansay ug inspeksiyon alang sa planong pagpalapad sa Talomo Bridge II sa Davao-Cotabato Highway.
Si Dean Ortiz, spokesperson sa Department of Public Works and Highways (DPWH)-Davao Region sayo niini nagsulti nga molusad sila og pagbansay alang sa pagpatuman sa Talomo Bridge II Widening Project sugod Martes hangtud sa Hunyo 22.
Ang kalihukan nakaaghat og grabeng trapik human ang Talomo Bridge I (southbound) gisirad-an sa tanang matang sa mga behikulo atol sa paglusad sa pagsulay ug rerouting scheme nga gipatuman sa CTTMO sa lokal nga kagamhanan sa siyudad sa Davao.
“This is a 2016 project na nahold due to the difficulty of acquiring RROW (Road right-of-way) for the construction of a detour bridge somewhere in Talomo. But now that the Talomo Puan bypass road is operational which can serve as an alternate route, the regional office has decided to pursue the project,” matud niya.
Dunay mga pahimangno ang gipahimutang sa mga nag-unang estratihiyang seksiyon aron nga pahibaw-on ang mga motorista sa pagsira ug ang mga alternatibong rota niini.
Ang trapik sa maong lugar mobalik sa alas 11:59 sa gabii sa Hunyo 22 diin gikanayon ni Ortiz nga wala pay tataw nga petsa kon kanus-a sugdan ang pagpalapad sa tulay.
“We will wait for the assessment of the CTTMO on the 3day test run which will then become our basis on how to implement the project in such a way that the inconveniences will be minimized,” dugang ni Ortiz.
Si CTTMO chief Dionisio Abude, nagsulti atol sa paghinabi nga ila nang gipanday ang traffic scheme aron nga iseguro ang hapsay nga dagan sa motorista.
Dunay one-way traffic scheme nga gipatuman ug gitambagan ang mga motorista nga kadtong mga sakyanan nga gikan sa Poblacion padung sa habagatan nga gamiton ang Talomo-Puan Bypass Road samtang alang sa pasulod nga mga sakyanan gikan Ulas nga gamiton ang Talomo Bridge 2.
Si Abude nagsulti nga dunay 37 traffic enforcers nga gipakatap sa lugar aron nga maseguro ang hapsay nga dagan sa mga sakyanan.
Ang maong hitabo gilaumang makaaghat og daghang reklamo, apan mihangyo si Abude sa ilang pagsabot kay temporaryo lang kini diin usa sa tumong aron nga mahatagan ang publiko og mas maayong dalan sa taliabot nga panahon.
“I am no longer surprise with the complaints. I will even be surprised if there were no complaints. Their complaints are valid but we should also look why there is traffic in preparation for the widening of the bridge,” tin-aw pa niya.
Usa sa mga hagit nga nasugatan atol sa dry run mao ang mga gahi og ulo nga mga drayber kinsa naghimo sa paglumbaanay aron nga mag-una nga maoy makapaaghat sa grabeng paghuot sa Talomo bridge 2.
Aron nga mapugngan kini, ilang gibutangan og ali gikan sa kanto sa Ulas padulong sa tulay.
Iya sab nga gitumbok ang kakuwang sa disiplina sa mga drayber nga maoy usa sa mga hinungdan sa grabeng pagguot sa trapiko.