WALA'Y kahadlok nga gi-angkon sa 16 anyos nga siya ang mi-dunggab patay sa usa ka traysikad driver nga natulog sa J.R Borja extension atbang sa Maria Reyna-Xavier University Hospital, siyudad sa Cagayan de Oro.
Giangkon sa minor nga siya maoy niluba sa drayber nga si Phillip Jumarito apan tungod lang matud pa nga lango kini sa ilimnong makahubog samtang natulog ang biktima.
Sa pakighinabi sa SunStar Superbalita ngadto na sa suspek nga 16 anyos, miingon kini nga siya lang mismo ang nag-inusara ang mihimo sa maong krimen.
"Ako lang man isa, wala man ko'y kauban. Hubog man ko, karon pa pud ko nakabuhat ani. Wala man sa ako ang cellphone," ang tipik sa pahayag niini.
Gisulayan kini sa pagpangutana sa SunStar Superbalita kung aduna na kini sila'y panagbingkil ug nganong nahimo ang maong krimen, apan magdumili kini sa pagtubag ug wala kini giluwatang pahayag apan igo lamang kining mibutyag nga tungod kay lango sa ilimnong makahubog.
Makitang nagkadugo usab ang kuko sa maong suspek diin kinsa miangkon nga siya ang mihimo sa krimen.
Nasikop sa mga otoridad ang suspek sa manhunt operation human nga aduna'y nakahatag kanila og impormasiyion kalabot na sa nahimutangan sa suspetsado nga menor de edad.
Padayon pa ang imbestigasiyon sa kapolisan sa maong panghitabo samtang ang menor de edad ang kasamtangang anaa sa ilang kustodiya. (KCS)