DAKO ang pasalamat ni Cagayan de Oro City Councilor Kagawad Edna Dahino, kinsa nangusog nga ma-aprobahan na ang ordinansa nga taod-taod na nga gipaningkamotan aron nga maprotektahan ang mga kabataan ilabi na sa human trafficking.
Sa nahitabong regular nga session sa City Hall, dako kaayo ang pasalamat ni Dahino human nga aprobado na ang ordinansa nga adunay numero nga 13407-2018 diin nagdili kini sa mga kabataan, ilabi na mga menor de edad, sa pagbiyahe gikan sa siyudad sa Cagayan de Oro nga mag inusara o adunay kauban apan wala'y dalang insaktong mga dokumento.
"Gikalipay gyud nato kaayo kay ato na gyud ning napasa ug gi acknowledge sa atong mayor nga magamit na gyud ni siya para sa atong mga kapolisan para ma imposar na nato ang atong balaod," pahayag ni Dahino.
Gidugang usab niya nga kini dako kaayo ang tabang sa mga kapolisan o sa mag-imposar niining maong balaod aron nga dili na mabalaka nga wala kini silay insaktong basehan sa pag-sita sa bisan kinsa nga aduna'y dalang menor de edad ilabi na kung mga langyaw.
Mas makatabang usab kini nga ordinansa nga mahugtan pa ug mas moubos pa ang ihap o kaso sa trafficking.
"At least, with our approved nga ordinance, mas mahugtan pa nga mas ma-minus pa, look at it, ma-minus pa ang mga kaso sa trafficking tungod ani nga kalamboan nga ordinansa nga magamit na gyud sa atong mga enforcer, so again, dako kaayo ni nga kalamposan sa 18th City Council," dugang niini.
Gikinahanglan lamang nga magdala og insaktong dokumento aron nga mapakita sa mga kapolisan.
"Ang importante is that magdala gyud og mga dokumneto ang mga tao nga of course kung naa gyu'y kanang legal gyud ang ilang paglakaw nga naa gyud silay papeles nga in case kung naa'y mag sita sa ila, they can automatically get it and show to the enforcer kung kadtong mga pulis nga gapangutana para once and for all nga free ang ilang paglakaw nga dili maghuna-huna nga sila usa ka biktima sa trafficking," dugang niini.
Karong mga panahona gipaabot, na lamang ang Implementing Rules and Regulations sulod sa mga 60 ka mga adlaw aron nga hingpit na kining mapatuman.
Aduna'y mga tukmang silot alang sa mga makitang makalapas niining maong balaod nga nakalatid diha sa ordinansa.