IPATUMAN na ang P1 nga usbaw sa pletehan sa mga motorela human nga gi-aprobahan na kini ni Cagayan de Oro Mayor Oscar Moreno.
Nasayran nga atol sa sa pagpakayab sa nasudnong bandila, gibutyag ni City Administrator Teddy Sabuga-a Jr. nga magtigom ang mga kadagkuan sa Business Permit & Licensing Office, Roads and Traffic Administration (RTA), ug City Legal Office sa ipagawas nga taripa alang sa mga motorela operators.
Gibutyag niini nga kinahanglan nga selyohan ang mga taripa ug kinahanglan nga orihinal matud ang ibutang sa mga motorela ug dili matud tugtan ang mga photocopy.
"Butangan nato og selyo ang taripa and we will not allow photocopy nga taripa. Kinahanglan original ang ibutang sa mga motorela," pahayag ni Sabuga-a.
Samtang sa pakighinabi sa SunStar Superbalita ngadto kang Kagawad Bong Lao, gibutyag niini nga ipatuman na gayud ang maong P1 nga usbaw sa pletehan tungod kay human kini na aprobahan sa konseho niadtong nilabay nga pipila ka mga session, gikonsidera na kini nga aprobado na pagkahuman sa 15 ka mga adlaw nga wala'y gihimong pagsupak o bisan unsa nga lakang ang lokal nga panggamhanan.
Gidugang niini nga susamang napihig ang katungod sa mga drayber kung na aprobahan na kini apan wala pa mapatuman.
Apan giklaro usab niini nga kinahanglan gyud nga magkuha og taripa aron nga mamahimong legal gyud ang pagpaningil niini sa mga sumasakay.
"Para gyud nga legitimate lugar gyud kung pila gyu'y actual price nga ibayad sa mga pasahero ipahibalo lang nila basta di lang sila mo go beyond unsay nakalatid sa ordinansa," ang pagklaro ni Lao.
Nasayran usab nga kinahanglan nga magpatuman ang mga drayber sa motorela sa insakto lamang nga pletehan nga nakalatid sa bag-ong taripa.
Gipahimangno-an usab ni Sabuga-a ang mga kolorum nga mga motorela operators diin migamit og mga orihinal nga mga numero sa plaka nga naka-rehistro.