MIBUKAL na ang kaldero sa pulitika sa Sugbo. Tungod man gud kay sa Oktubre na karong tuiga ang pag-file sa certificates of candidacy (COC) alang sa mid-term elections karong Mayo 2019, diin pili-on ang 12 ka mga senador, mga kongresista, governors, mayors ug ubang mga elective local government officials.
Ang gibantayan karon sa mga botante ang mga partido diin anaay giingong panag-ilog sa mga buot mokandidato sa maong eleksiyon sama sa Cebu City. Si kanhi Cebu City mayor Mike Rama desidido na nga modagan sa pagka-mayor ug buot niya nga si Vice Mayor Edgar Labella mao gihapon ang iyang bise ubos sa Barug Team Rama. Apan si Labella giawhag sa PDP-Laban nga maoy ilang standard bearer kay si Rama dili man sakop sa ilang partido. Kaniadto daghang nagtuo nga mahaylo si Rama sa PDP-Laban pinaagi kang Presiden tial Assistant for the Visayas Mike Dino. Uli-an lang kuno si Rama sa iyang nagasto niining iyang pagdumala sa Barug Team Rama. Apan morag dili na mapugngan si Rama sa iyang pag- ilog pagbalik sa Cebu City hall. Gani, iyang gipahibawo nga sakitan siya kon modagan gayud pagka-mayor si Labella. Ang bise mayor hinuon gipaabut nga mopahibawo na kon unsay iyang lansaran karong Hunyo 30.
Sa Mandaue City, daw siguro na nga mobalik sa city hall si karon Kong. Jonas Cortes. Apan si incumbent Mayor Luigi Quisumbing magpapili pa og usab sa maong posisyon. Nasayran nga adunay kabangian si Quisumbing ug Cortes. Mapiangan si Luigi kay nasuko kuno kaniya ang iyang apuhan nga si Norberto Quisumbing. Si kanhi konsehal Lollipop Ouano Dizon mao karon ang gidani sa duha ka habig kay makatabang siya sa ilang kadaugan. Apan nagtuo ang iyang mga supporters nga modagan siya pag-usab sa pagka-mayor.
Sa Lapu-Lapu City, matapos na ang termino ni Mayor Paz Radaza. Ang iyang kapikas, Boy Radaza gipaabut nga maoy modagan puli kaniya kay dugay na kining gipangandoy sa kanhi mayor ug kongresista sa maong dakbayan. Apan adunay mga intriga nga kuno kumbinsihon ni Mayor Paz ang ilang anak nga si Kong. Aileen nga maoy modagan pagka-mayor ug mopuli sa iyang pwesto mao si Mayor Paz. Sa Talisay City, mag-ilis og pwesto si Kong. Samsam Gullas ug iyang apuhan Mayor Eddie Gullas. Parangan si Samsam ni kanhi mayor JVR. Sa lungsod sa Consolacion, magtigi pa og balik si kanhi mayor Gungob ug sa naglingkud nga si Mayor Alegrado. Sa sunod kong hisgutan, ang ubang political developments sa nasud.
(msr1144@yahoo.com)