GIPALAGPOT na sa “kanhi laos nga pulitiko” sa Bando Osmeña Pundok kauswagan (BOPK) si Mabolo Barangay Captain-elect Niña Mabatid. Kini nunot sa hugon-hugon nga modagan si Mabatid sa pagka-presidente sa Association of Barangay Councils (ABC) batok sa kaalyado sa BOPK nga si Kasambagan barangay captain-elect Franklin Ong.
Sibaw ang balita nga modagan gyud si Mabatid kay ang Office of the President mao ang miawhag kaniya. Kon mahinayon siya, mamahimong three cornered fight ang ABC apil na ang kasamtangang ABC president nga si Tisa Barangay Captain Philip Zafra. Wala makauyon ang “kanhi laos nga pulitiko” sa plano ni Mabatid.
Pero kon mahinayon man si Niña sa paglansar sa ABC, dili usab nato siya mabasol. Gumikan kay giluiban man siya sa “kanhi laos nga pulitiko,” butang nga wala niya damha. Silang duha managhigala. Gani dako og natabang si Niña kaniya niadtong miaging mga eleksiyon, miamot si Niña og dakong kantidad sa kampaniya sa BOPK. Siguro, gamay lang kang Franklin Ong. Pero maayo man si Ong kay nakabawi man sa iyang gasto kay nakakuha man siya og dakong kontrata sa City Hall ubos sa karon nga administrasyon. Si Niña wala mosulod og kontrata sa City Hall.
Niadtong mga panahon nga wala ang “kanhi laos nga pulitiko” sa gahum human sa iyang kapildihan ni Mayor Mike Rama niadtong 2013 elections, si Niña ang usa sa mga misagakay kaniya, pinaagi sa pagdasig kaniya. Kanunay siyang imbitahon sa mga parties sa kompaniya ni Niña. Gihatagan siya og importansiya.
Niadtong miaging barangay election, ang “kanhi laos nga pulitiko” maoy nag-awhag kang Niña nga molansar pagkakapitan kay natapos na ang termino ni Kapitan Rey Ompoc. Tuod man, misanong si Niña. Apan nahingangha na siya kay ang tawo nga iyang gituhuan nga higala, didto naman hinuon misuporta sa iyang kaatbang. Dili ba kadto tinrayidor? Kon kamo naa sa sapatos ni Niña, unsa man ang inyong bation? Aber?
(bobbygnalzaro@gmail.com)