USAHAY duawon kita sa kamingaw labi na kung naa kita sa mga dapit nga didto nahitabo ang mga kagahapong di gyod nato malimtan.
Sa milabay nga semana man god, giadto namo ang usa ka beach sa San Remigio, ang kinatumyan nga punta sa Kaputian District sa Island Garden City of Samal (Igacos), probinsiya sa Davao del Norte, uban sa akong suod na kaayong higala nga usa ka pulis.
Ang kaputli sa dapit, kaputi sa balas ug kolor blue nga tubig-dagat ug ang huyuhoy sa bugnaw nga hangin sa udtong tutok ilawom sa landog sa talisay, maoy nakapahinumdom sa akong mga masadya nga kagahapon sa kabatan-onan sa among dapit sa Sta. Maria, Davao Occidental.
Giadto namo ang Alorro Beach ug ang Samalan Camp & Sea kay sikat kaayo kini nga mga pangalan sa mga beach diha sa social media.
Dugang nakapaagni namo nga moadto mao ang mga nindot kaayo nga mga piktyur nga kuha sa dapit nga gipang-post sa Facebook.
Tuod man, bisan og misaksi lang kami sa kanindot sa lugar nabati nako nga nibalik ko sa akong kagahapon didto sa among dapit, gumikan igsama kaayo ang dagway sa palibot.
Mao tong bisan og layo kaayo ang dapit, nabayran man sab sa mga piktyur-piktyur nga among gipang-post karon sa FB, uban sa garbo nga naa pa gayoy mga tago nga dapit sa atong rehiyon ang makumpara sa mga nindot nga lugar sa laing kanasuran.
Magpabilin man gyod ang kanindot sa dapit kung di lang nato abusaran, sama na lang pananglit anang pataka kita'g labay sa atong mga hugaw.
Kung naa man kita'y mga susama niini nga mamahimong usa sa mga tourist attractions, nan, atoa kining ampingan, gumikan usa kini ka bahandi nga gasa sa Kahitas-an nga posibleng maghatag sa atong mga panginahanglan sa matag adlaw.
Daghang salamat diay kang Police Regional Office (PRO)-Davao Region Spokesperson Chief Inspector Milgrace Cajes Driz, kay kung di pod tungod ni Ma'am Driz, di gyod mi kaadto uban sa akong higala nga si Grace Saron, kung tuyuon lang kay arang layoa, maayo man si Ma'am kay naay sakyanan. Thank you, Ma'am!
Sa sunod na sab Sabado, sa laing pagkulokabildo nato ngari. Happy Sabado natong hurot.