NAKUHA na sa pamilya ang patay’ng lawas sa usa ka 23-anyos nga lalaki kinsa nalumos human namingwit sa Davao River.
Ang patay’ng lawas nakit-an sa Aroma Beach, Barangay 76-A Bucana, Davao City alas 6:30 Huwebes sa buntag, Hunyo 21.
Matod ni Senior Inspector Ma. Theresita Plaza-Gaspan, Davao City Police Office (DCPO) spokersperson, nga gikuha na sa pamilya ang patay'ng lawas sa biktima nga si John Rey Lagunsay Dawa, taga Awhag Village, Bacaca Road, Brgy. 19-B.
Usa ka mananagat ang unang nakakita sa patay'ng lawas nga naglutaw-lutaw 1.5 kilometros ang gilayon gikan sa lapyahan sa Aroma Beach.
Giingong nalumos ang biktima human namingwit og isda sa Davao River duol sa ilang gipuy-an alas 11 sa buntag niadtong Martes.
Ang patay nga lawas sa biktima gihaya na sa ilang panimalay. (Jeepy P. Compio)