HANGTUD sa pagsulat nako ning lindog, wala pa gyud ko makatan-aw sa Jurassic World. Pero asa ra man god na? Mangita man gyud kog higayon ba.
Sama ni AC Martin, nagsubay sab ko sa mga pelikulang Jurassic. Ang akong nahinumduman sa gisundan ning Jurassic World The Fallen Kingdom mao nga sa nakabuhi na ang mga dinosaur, nagkaguliyang ug nagdinaganay ang tanan.
Pero ang bidang babaye sukad sa pagsugod og dagan sa didto pa sa kasagbutan hangtud niabot sa sentro sa isla nga nindot ang mga balay, wala gyud mobiya sa iyang sapatos nga taas og tikod.
Makasabot sab hinoon ta kay sakit baya kon magtiniil nga magdagan labina kon wala maanad. Karon sa Jurassic World The Fallen Kingdom, ako na sab nga bantayan kon unsay esena nga medyo simang.
* * *
Duna sab koy nakitang salida samtang nagsakay og bus diin ang bidang babaye nagsul-ob og scarf nga gipandong una pa gilikos sa liog dayong pabitay sa likod. Morag Chinese Salesman man seguro to ang ulohan.
Ingon na niadto ang gisul-ob sa babaye sa ilang miting hangtod nga nibiyahe sila ug nasum-ok sa lugar nga may gubat. Ginukdanay sa sakyanan, dinaganay, pinusilay ug uban pang kulba-hinam nga esena.
Pero asa ka? Wala gyud matangtang ang headdress, bisan nagkaabog na lang ug nagkabulingit. Pastilan! Fashion pa more!
* * *
Ambot kon daghan ba mig parehas og gibati pero nalipay ko sa balita nga may bag-ong programa si Martin Nievera diin dili abilidad sa pagkanta ang iyang ipakita kon dili pagtabi ug pagkyawkyaw (o-ha!).
Nainila si Martin niadto isip talk show host ug gani nagtigi kini sila ni Edu Manzano sa maong kategoriya. Nindot ang dagan sa programa kaniadto pero giilisan ngadtongadto sa ambot unsang hinungdan.
Sulayan nakog ma-carry ba sa body ang pagsubay sa programa kay gabii man ang skedyul niini.
* * *
Laing kalambuan nga nakahatag og pahiyom nako mao ang lakang sa pagpabalik sa subject nga Good Manners and Right Conduct sa elementarya. Basin na lang mabalik ang mga nindot nga taras, kinaiya ug pamatasan labina sa mga linghod pa og pangedaron.
Lahi na man god ang mga batan-on karon. Kana lang pagtunol sa plete sa dyip, di na gyud ka makadungog og ‘palihug’ ug ‘salamat.’ Kon makadungog man ugaling, mga edaran na ang mosulti niini.
Kasagaran moingon lang: ‘Plete o!’ Mora bag konduktor ta nga gitunolan o atong responsibilidad ang pagdawat gikan sa nagplete aron itunol sa drayber. Paet! Millenials pa more!