KON instagrammable spots ang imong gipangita sa pagsuroysuroy, di magpauwahi niini ang Bangkok, Thailand.
Ang dapit namungingi sa maanindot nga templo bisan asang suok sa capital city sa nasud hinungdan nga kini gikonsiderar nga usa sa mga “most instragrammed cities” sa tibuok kalibutan.
Dinhi imong makit-an ang Wat Arun, ang templo nga giisip nga adunay labing daghang hulagway nga nakuha nunot sa kanindot niini, sumala sa cnn.com.
Sa pinulungang Thai, nagpasabot ang “Wat” nga templo. Ang ngalang Arun naggikan sa pangan nga Aruna, ang Indian God of Dawn hinungdan nailhan sab ang Wat Arun isip Temple of Dawn.
Adunay 79 metros nga gitas-on nga “prang” o tower sa tungang bahin sa Wat Arun ug kini gialirungan og upat ka mga gagmayng prang.
Ang mga prang gipanindutan og mga ceramic tiles ug mosaic sa mga buak ug mabulukon nga mga Chinese porselana nga ginamit isip pabug-at niadto sa mga barko gikan sa nasud sa China paingon sa Bangkok.
Sumala sa www.watarun.net, ang taas nga Khmer-style prang uban sa upat nga mga mubo nga prang nagsimbolo sa “terrestrial” nga representasyon sa “33 heavens”.
Mahimo nimong lakwon ang titip nga hagdanan sa prang ug dinhi imong makita ang nabantog nga sapa sa Chao Praya.
Gisugdan og pagtukod ang atraksyon sa panahon ni King Rama II (1808-1824) nga gihuman ni King Rama III (1824-1851).
Ang nakapahimong espesyal niini tungod kay ang imahe niini imong makita sa 10-baht nga sinsiyo sa salapi sa nasud.
Nahimutang ang Wat Arun sa may kasadpang bahin sapa sa Chao Phraya, atbang lang kini sa laing mga nabantog nga templo sa Wat Pho ug Grand Palace.
Kon mobisita kamo dinhi, mas maayo nga taas ang mga saya sa mga babaye o kun mag-short man, tabunan kini og panapton. Adunay mga paabangan nga tabon sa paa ang gawas sa templo.
Sa mga lalake, pwede ang shorts apan di pwede ang sleeveless shirt. Di pud pwede ang mag-tsinelas sa parehong babaye ug lalake.
Mas maayo nga personal ninyong masud-ong ang templo nunot sa maanindot ug detalyadong desinyo niini.
Daghan sab ang niingon nga ang labing nindot nga view sa templo makita atbang sa may sapa sa Chao Phraya, panahon sa pagsawop sa adlaw.