WA pa man tuoy opisyal nga pamahayag, apan gikataho nga magpabilin ra diay gihapon si LeBron James sa Cleveland Cavaliers.
Si Bryan Windhorst sa ESPN nagkanayon nga si James nangita na og rason ug nagpasumbingay nga magpabilin sa iyang yutang natawhan ug andam kining mohatag sa Cleveland og laing NBA championships.
“I think LeBron’s preference is to stay in Cleveland. ... I think he’s looking for reasons to want to stay in Cleveland,” matod ni Windhrorst sa iyang na-post sa @WeAreCavsNation.
Giingon nga sa Hunyo 29 mopagawas sa iyang final decision si James, pila ka adlaw sa dili pa siya mamahimong free agent sa Hulyo 1 diin mahimo na siyang makapirma sa Cavaliers o sa bisan asa nga team alang sa sunod season.
Ang tinubdan nagkanayon nga ang front office sa Cavs ug ang kampo ni James ang padayon sa ilang negusasyon bisan tuod og wala ang giilang kasamtangang pinakamaayong basketbolista sa NBA.
Ang Los Angeles Lakers, Houston Rockets ug Philadelphia Sixers pulos mipadayag sa ilang tinguha nga mabira si James human gihugonhugonan kini nga mobita sa Cleveland ilabi na sa dihang giharos sila sa Golden State Warriors sa finals.
Si Enes Kanter sa New York Knicks misuway usab paghaylo ni James.
Samtang ang Cleveland gikataho nga mokuha og dugang back up nga makatabang ni James. (JBM)