TALIWALA sa kahugot nga kombati, gipakita ni Cristiano Ronaldo ang iyang kahanas ug kapabilidad aron ituboy ang Portugal ngadto sa 1-0 nga kadaugan batok sa Morroco sa 2018 Fifa World Cup sa Russia.
Ang fourth-minute header ni Ronaldo maoy hingpit naghatod sa Portugal sa sunod round human kini makigsawo sa liderato sa Group B ug sa samang higayon nagpupos sa paglaom sa Morocco sa maong kompetisyon.
Kadto mao usab ang ikaupat nga goal ni Ronaldo ning tournament human sa iyang mainiton nga performance sa dihang ilang natablahan ang Spain, 3-3.
Ang Portugal aduna na karoy sumada nga upat ka goal diin ilang gikauban ang Spain nga mibuntog usab sa Iran, 1-0.
Sikit nga nagsunod ang Iran nga may tulo ka goal samtang ang duha ka kapildihan sa Morocco maoy nag-ugbok sa ilang paglaom. Napildi usab sila sa Iran, 1-0.
Bisan pa man sa kadaugan, daw sa nasagmuyo gihapon si Portugal coach Fernando Santos sa iyang nakita.
“We have to look at this, we lost control of the game,” matod ni Santos “We misplaced a lot of passes, we lost confidence... it was inexplicable. If in a match against players like they have, if you don’t have the ball, they wear you down and you get into trouble.”
Ang Spain, sa ilang bahin, miagi una og makutas nga dalan sa ilang hugot nga pagpakigkombati sa Iran una pa nila malabni ang 1-0 usab nga kadaugan.
Human sa pipila ka higayon nga pagsuway ug sa hugot nga depensa, ang Spain ning higayona misanding sa bayanihong goal ni Diego Costa alang sa 1-0 nga kadaugan.
Kini nahitabo sa ika-54 minutos sa dihang nakapahimutang si Andres Iniesta og nindot nga pasa nga wa usab dayon usiki ni Costa.
Di man tuod impresibong ang kadaugan, apan ang maong goal igo na kaayo makapahupay sa gibati sa ilang coach nga si Fernando Hierro.
Si Costa kinsa adunay duha ka goal batok sa Portugal, aduna nay sumada nga tulo ka goals sa nagpadayon nga World Cup, nga nagsunod sa upat ni Ronaldo. (JBM)