NIDANGOP ngadto sa Talisay Police Station kagahapon ang usa ka 21-anyos nga babae human giingun gihagkan ug gihikap ang iyang dughan sa usa ka clerk sa barangay sa ilang dapit.
Matod sa babaye nga ang pagpangmolestiya kaniya nahitabo niadto pang Hunyo 14 sa dihang nagkuha siya og barangay clearance sa ilang barangay hall sa Brgy. Dumlog, dakbayan sa Talisay.
Saysay niya nga samtang padung na siya monaog sa hagdanan, ang clerk nga iyang giila nga si Mark Anthony Gabornes, 34, kalit lang nga migakos kaniya ug midayun og hikap sa iyang pribadong parte sa lawas.
Dali kining gihapak sa babaye apan human kini niya hapaka, kalit lang kining migunit sa iyang nawng ug mihalok pa kaniya.
Dugang sa babaye, wala dayon siya makalihok o makasukol kay nakalitan siya sa panghitabo ug nahadlok sab siya nga basin unya og matagak siya sa hagdanan.
Matod sa amahan sa babaye, kinsa usa ka kanhi tanod sa Barangay Dumlog, nga kadaghan na kining buhata sa maong clerk ngadto sa ubang babae apan karon lang higayuna nga may mireklamo kaniya.
Apan si Gabornes sa iyang bahin, hingpit nga mihimakak sa pamasangil ug matod niya gi himo-himoan lang siya og istorya.
Matod niya, gihimo lang kini sa babeye aron matangtang siya sa iyang puwesto isip clerk sa ilang barangay hall.
Apan matod niya nga kung aduna man siyay nahimo nga bati ngadto sa babaye, mangayo siya og pasaylo niini.
Human naka-file na og blotter ang babaye, porisigdo karon sila nga mopasaka oug kaso. (JDS - Correspondent)