SOBRA sa P2.3 milyones nga kantidad sa gituohang shabu ang nasakmit sa kapulisan sa dakbayan sa Mandaue sa duha ka managlahing buy-bust operation sa Brgy. Guizo niadtong Miyerkules.
Labing uwahing nasikop sa mga taga City Drug Enforcement Unit (CDEU) sa Mandaue City Police Office (MCPO) mao si Bernardito Pepito alyas Berto o Kram, 38, taga F. Ralota St., Brgy. Poblacion, dakbayan sa Danao.
Si Pepito nasikop sa mga taga CDEU nga gipanguluhan ni PInsp. John Lalamunan didto sa Brgy. Guizo, pasado alas 3 sa hapon.
Nakuha gikan kaniya ang duha ka dagkong pakete sa gituohang shabu nga adunay timbang nga 200 gramos ug may dangerous drug board (DDB) value nga P2.3 milyones.
Matod sa hepe sa MCPO nga si PSSupt. Roberto Alanas nga ang pagkasikop sa suspek resulta sa malampusong kampanya niini sa pag-report og mga tawo nga nalambigit og drugas nga mao “texthang”.
“Eto ay resulta ng texthang..” matod ni Alanas, diin wa nalakip sa watchlist si Pepito apan tungod sa kadako nga nakuha nga drugas, nagtuo siya nga kini sakop sindikato.
Sa pagkakaron, padayon pa ang follow-up sa MCPO kalabot sa kung diin gikan si Pepito sa drugas.
Pasado alas 10 sa buntag sa maong adlaw, tulo sab ang nasikop sa Station 1 sa MCPO sa buy-bust sa MC Briones, Brgy. Guizo.
Ang mga nasikop mao sila si Alma Talaugon alyas Madam, 43, Mark Arisgado, 22, ug Renante Talaugon, 36 anyos.
Nakuha gikan sa tulo ang medium ug 5 ka mga gagmayng pakete sa shabu nga mobalor og P26,000. (JPP)