GIPASAKAAN na Og kasong robbery extortion kadtong pulis nga sakop sa Consolacion police station nga gi-entrap sa mga sakop sa Talamban police station human mangayo og P10,000 sa tag-iya sa cellphone nga gi-turn over kaniya.
Si SPO2 Vicente Gila nangayo og P10,000 kang John Vincent Rafols nga taga syudad sa Davao bugti sa pag-uli sa iPhone 8 niini nga gi-turn over, matod pa sa usa ka taxi driver ngadto sa maong pulis.
Matod ni Chief Supt. Debold Sinas, director sa Police Regional Office 7, nga bisan pa nga dili ma padayon pag taral ang kasong criminal sanglit dili taga Sugbo ang biktima mahimong matangtang gihapon sa serbisyo si SPO2 Gila tungod sa kasong administratiba.
Lig-on matod pa ang ebidensya nga gihuptan sa Talamban police diin sila mismo ang misikop niini sa dihang gidawat ang kwarta nga iyang gipangayo gikan ni Rafols.
“Na-file na ang kaso niya sa korte, bisan pa dili mo padayon ang kaso naa man siyay admin case nga ang pulis maoy complainant, lig-on ang ebidensya niya kay gi-entrap siya sa police,” matod ni General Debold Sinas.
Gikuhaan na sa iyang armas ug badge si SPO2 Gila ug kung makapyansa kini sa iyang kaso gimandoan na ni General Sinas ang Personnel Division nga idestino kini sa holding accounting unit sa PRO-7. (AYB)