MOBALOR og P6,868,800 ang mga tanom nga marijuana ang naibot sa mga sakop sa Philippine Drug Enforcement Agency (PDEA) 7 inabagan sa Cebu City Mobile Force Company sa Cebu City Police Office sa Sitios Mit-ol ug Mapa sa Barangay Tagba-o nga bukirang dapit sa dakbayan sa Sugbo.
Dili mominos 17,172 ka fully grown marijuana ang gipang-ibot sa mga sakop sa PDEA-7 ug CCPO niadtong milabayng hapon sa duha ka mga sitio sa Tagba-o.
Nakadawat og impormasyon ang awtoridad labot sa mga tanom nga marijuana nga maoy hinungdan nga milusad sila'g surveillance sa dapit ug nasuta nga positibo.
Nasikop nila ang gituohan nga maoy nagtanom sa maong mga marijuana nga si Ireneo Borres 50,nga nagpuyo ra usab sa maong dapit.
Nakahukom ang PDEA-7 ug ang mga sakop sa CCPO nga sunogon na sa lugar ang mga nakuhang marijuana diin nagdala nalang silang sample alang sa examinasyon.
Gibutyag sa PDEA nga tungod sa sub-sub nga kampanya batok sa illegal nga drugas nga shabu misaka karon ang demand sa marijuana sa tibuok metro Cebu karong mga panahona nga maoy hinungdan nga ila usab nga hingusgan ang pagpuhag niini. (AYB)