TINGUHA sa mga sakop sa Cebu Provincial Bus Operators Association (CPBOA) nga mahimong P11.45 ang pletihan sa bus sa unang lima ka kilometros samtang P1.55 sa matag mosunod nga kilometro.
Apan gusto ni Julie Flores, chairman sa Cebu Provincial Bus and Mini Bus Operators Cooperative, nga dili kaayo dako ang pangayuon nga umento sa pletihan kay nagsaka-kanaug ang presyo sa mga produktong petrulyo.
Gusto niya nga P10 lang ang mamahimong pletihan sa bus ug mini bus sa unang lima ka kilometros ug P1.50 sa matag mosunod nga kilometro.
“Ang ako untang gusto nga gamay ra akong pangayuon nga increase sa pletihan para di mabug-atan ang mga sumasakay, luoy ang mga pasahero,” pahayag ni Flores dihang nahinabi sa Superbalita Cebu kagahapon.
Iyang awhagon ang dagkong mga kompaniya og bus nga moduso og ilang kaugalingong petition sa Land Transportation Franchising and Regulatory Board aron mangayo og usbaw sa pletihan kay ang iyang isang-at nga petition alang sa ilang grupo, ang CPBMBOC.
“Para walay misunderstanding nga mahitabo,” dugang ni Flores.
Apan sumala ni Richard Corominas, presidente sa CPBOA nga ilang gipatas-an daan ang pangayuon nga umento kay i-adjust pa kini sa LTFRB inig kwenta na.
Siya nipasabot gikinahanglan nang umentohan ang pletihan kay nimahal na ang presyo sa fuel, spare parts, mga ligid, lubricants ug maintenance sa mga operator tungod sa Tax Reform for Acceleration and Inclusion (Train) Law.
“Swerte na gani kaayo kanang sumasakay sa Cebu province sa pila ka tuig gud nag-us-os sa pletihan gud. Di na lang sad diay nila patilawon ang operator og ginansiya, sa expense of the operator nga di na ka-maintain,” padayag ni Corominas sa buwag nga pakighinabi ning mantalaan.
Matod niya, deperensiya og 50 sentimos ang ilang pangayuon nga umento sa unang lima ka kilometros kon itandi sa gipangayo sa mga bus operator sa Luzon, samtang 30 sentimos ang deperensiya sa mosunod nga kilometro.
Alang sa air-conditioned nga mga bus, mas taas og 20 porsyento ang umento sa pletihan kon itandi sa ordinaryong mga bus.
Sa kasamtangan, P8 ang plete nga gikolekta sa mga bus sa unang lima ka kilometro ug P1.40 sa matag mosunod nga kilometro, samtang P6 ang gikolekta sa mini bus sa unang kilometro ug P1.20 sa mosunod nga kilometro.
Niadtong Pebrero ning tuiga, ang Southern Luzon Bus Operators Association, Nagkakaisang Samahan ng Nangangasiwa ng Panlalawigang Bus sa Pilipinas ug Samahang Transportn Operators ng Pilipinas niduso sa ilang joint petition sa LTFRB.
Sa maong petition, gusto sa tulo ka mga grupo sa bus nga mahimong P13.30 ang minimum fare sa ordinaryong bus gikan sa P10 sa kasamtangan. Samtang P2.45 sa mosunod nga kilometro.
Sa mga air-conditioned nga bus, P15.95 ang ilang giduso nga bag-ong minimum gikan sa P12 sa kasamtangan ug P2.95 sa mosunod nga kilometro.
Alang sa mga provincial bus, P11.95 ang ilang giduso alang sa unang lima ka kilometro gikan sa P9 sa kasamtangan ug P2.95 sa mosunod nga kilometro.