Mga gasaway sa MisOr Cares gikataw-an lang

“MAKAKATAWA kita kay ilang gasawayon ang MisOr Care pero ilang gaawaton.” Kini ang tubag ni Rhanddy Akut kinsa head sa Misamis Oriental Care System human sa pipila ka mga batikos ug pagsaway nga nadawat sa programang gimugna ni Misamis Oriental Governor Yevgeny Vincente Emano.

Matud niini nga ang milyon nga mga tao nga naserbisyuhan sa programa ni Governor Emano maoy makatestimonya kon unsa ka maayo ang programa ug kon aduna bay kamatouran ang mga gipakatap sa ilang mga kaatbang.

Gipasalig ni Akut nga taman sa mahimo sa probinsya ug kamandoan ni Emano ila kining himoun alang sa katawhan nga nagkinahanglan.

“Taman sa atong magahom ug makaya, whatever mandate sa atong Governor ug unsay gabayan sa mga polisiya sa MisOr Care. Ma prove namo gikan sa mga tao kay sila maketestify unsa ilang napahimuslan sa MisOr Care,” dugang niini.

Ang buhatan sa Misamis Oriental Care System maoy nagpaabot og report sa press briefing nga gipahigayon sa Kapitolyo Probinsyal niadtong Martes.

Ang MisOr Cares namugna niadtong Hulyo 7, 2014 sa inisyatiba ni Gov. Bambi Emano.

Kini gumikan sa rason nga dako kaayog utang nga gibilin ang kanhi namunoan sa probinsya didto sa Philhealth.

Gikan sa pagkamugna niini ubay ubay na nga serbisyo ang natunol nga moabot na ngadto sa 1,189,981 ka mga serbisyo.

Gikan sa tuig 2014 ngadto 2015 ang serbisyo nga napaabot sa katawhan moabot sa 594,620; tuig 2016 moabot ngadto sa 933,860; tuig 2017 mokabat na sa 1,142,020 ang naseribsyuhan ug gikan sa bulan sa Enero ning tuig 2018 ngadto Marso moabot sa 47,961.

Kung sumahon ang serbisyong nahatod sa MisOr Care sa probinsya gikan niaging tuig 2017 hangtod sa kasamtangan moabot kini sa 1,189,981.

Ang mga programa sa MisOr Care gilangkoban sa libreng hospitalisasyon sa mga nasakit, naaksidente, nanganak ug uban pa, blood assistance, laboratory services, calamity assistance, 3 in 1 kon libreng balsamar, lungon, lakip ang paghatod gamit ang sakyanan sa probinsya ngadto sa katapusang kapahulayan sa mga mipanaw nga indibidwal.

“Subling akong iklaro nga kini nga mga assistance nato ma-avail kining libreng hospitalisasyon sa atong walo ka mga Provincial Hospital sa lungsod sa Magsaysay, Gingoog, Talisayan, Balingasag, Claveria, Alubijid, ug Manticao.

“Kung ikaw usa ka Misamisnon ug nagkapot kag access card sa MisOr Care unya og nasakit ka pwede kaayo nimong dalahon sa atong walo ka mga probinsyal hospital o kadtong hospital nga doul kanimo ug ipakita imong card didto sa atong mga satellite offices,” pasabot ni Akut.

Kini tungod kay kon ang usa ka individwal naghupot na og card sa MisOr Care secure kining dili na kuti-kutihon og interbyu sa pag-abot sa balay tambalanan, secure kining makapatambal deretso ug zero billing ang hospitalisyon niini pagawas sa balay tambalanan.

Ang maka-avail sa programa tanan mga nagkinahanglan og tabang nga taga Misamis Oriental kung diin gibasihan ang igong kapasidad sa pinansyal nga aspeto ug labina gyod niadtong mga nag-income lamang og P6,000 ang kita paubos sulod sa usa ka bulan.

Dugang ni Akut nga aron sab maka-avail og libreng tambal nga dili na mahasol.

“Pagpacheck-up gyod sa atong mga Provincial Doctor aron sila maoy makahatag og resita dayon ang resita ihatag sa among buhatan ug kami ang mohatag kaninyo og mga libreng tambal.” Pasabot niini. Kini human adunay mga nadawat nga report nga dili modawat ang MisOr sa Cares sa resita gikan sa pribadong doctor.

“Sa pagkakaron kadtong taga MisOr nga nagkapot og resita gikan sa private doctor pwede gihapon silang moanha sa atong buhatan diha atbang sa Kapitolyo kay 24/7 man kita kay aduna tay mga sakop nga moatiman gyod kanila nga maresitahan sila pinaagi sa Provincial Doctor,” pahayag niini.