Ernesto D. Lariosa
San Fernando, Cebu
(Sa Lider nga kuan gitungaw)
NIKAPYOT ko sa imong pasalig aron makaabot
Sa halapad nga buko-buko sa gipanagkos
Mong mga pulong daw hapin sa pako
Nga milupad sa akong pagsakay ngadto diay
Sa sangputanan lagbas ngadto sa kamatayon
Sa akong damgo.
Sa pagpangalarag sa mga dahon sa kinaiyahan
Human nimo halinga ang budhi sa imong pasalig
Sa pag-uyon mo sa hakot sa kabulahanan
Mingdagsa sa lawak sa imong short pants
Sa ubang pundohanan nga gitala sa mga letra
Diha sa luspad nga mga papel nagdibuhog
Buak nga mga pahiyom sa nagyambi
Mong mga ngabil sa utok nga sa abog gilubgan.
Ang sapa nalubog human kawta ang yuta sa bungtod
Ang dagat misamot kaparat pagkalumos sa mga isda
Nga wa nila tuyoa pagkalimot sa ilang pagginhawa
Diin ilang mga kalabera di madugmok sa kanunayng
Paghandom sa akong kahiubos sa imong pagtalikod
Sa pultahan nga maoy mopakayab sa imong kaakuhan
Pagpakgang sa bisan unsang pangahas paghugawhugaw
Sa limpiyong panganod sa mando sa ilang mga kaabin.
Sa sunod sama sa abugong hangin di na ko nimo makita
Mitalikod na ko sa pagpanglalin sa atong mga langgam!